ചാവക്കാട്:പാലയൂര്‍ സെന്റ് തോമസ് തീര്‍ഥാടന കേന്ദ്രത്തില്‍ ക്രിസ്മസ് ആഘോഷം പൊലിസ് മുടക്കിയെന്ന് പരാതി. പള്ളിയില്‍ രാത്രി ഒന്‍പതോടെ തുടങ്ങാനിരുന്ന കാരള്‍ ഗാനം പാടാന്‍ പൊലിസ് അനുവദിച്ചില്ല. ഉച്ചഭാഷിണിക്ക് അനുമതിയില്ലെന്ന് പറഞ്ഞാണ് പൊലിസ് എത്തി കാരള്‍ തടഞ്ഞത്. 

പള്ളിമുറ്റത്ത് കൊടിമരത്തിന് സമീപം ചെറിയ വേദിയൊരുക്കി അതിന് മുകളിലാണ് കരോള്‍ പാടാന്‍ സജ്ജമാക്കിയിരുന്നത്. ഒമ്പത് മുതല്‍ 10 വരെയാണ് ഇത് നടത്താനിരുന്നത്. കരോള്‍ നടത്തിയാല്‍ വേദിയിലൊരുക്കിയ നക്ഷത്രങ്ങള്‍ ഉള്‍പ്പെടെ തൂക്കിയെറിയുമെന്ന് എസ്.ഐ ഭീഷണിപ്പെടുത്തിയതായി ട്രസ്റ്റി അംഗങ്ങള്‍ പറഞ്ഞു. 

ക്രിസ്മസ് തിരുകര്‍മ്മങ്ങള്‍ക്കായി സീറോ മലബാര്‍ അധ്യഷന്‍ മാര്‍ റാഫേല്‍ തട്ടില്‍ തീര്‍ഥ കേന്ദ്രത്തില്‍ എത്തുന്നതിന് മുമ്പായിരുന്നു സംഭവം. ഇടവക അംഗങ്ങളില്‍ ചിലര്‍ കേന്ദ്രമന്ത്രി സുരേഷ് ഗോപിയെ ഫോണില്‍ വിളിച്ചതിനെ തുടര്‍ന്ന് എസ്.ഐ.യ്ക്ക് ഫോണ്‍ നല്‍കാന്‍ മന്ത്രി ആവശ്യപ്പെട്ടെങ്കിലും സംസാരിക്കാന്‍ എസ്.ഐ. തയ്യാറായില്ല. തുടര്‍ന്ന് ഉന്നത പൊലിസ് അധികാരികളെ സുരേഷ് ഗോപി വിളിച്ചെങ്കിലും കരോള്‍ ഗാനത്തിന് പൊലിസ് അനുമതി നല്‍കിയില്ല.

വര്‍ഷങ്ങളായി പതിവുള്ള പരിപാടി ആണെന്നും ആദ്യമായാണ് മുടങ്ങുന്നതെന്നും ട്രസ്റ്റി അംഗങ്ങള്‍ പറഞ്ഞു.