തൃശൂര്‍: കേരളത്തെ ഞെട്ടിച്ച് വീണ്ടും നിക്ഷേപ തട്ടിപ്പ്. ഇരിങ്ങാലക്കുടയില്‍ ഷെയര്‍ ട്രേഡിങിന്റെ പേരില്‍ 150 കോടി തട്ടിയതായി പരാതി. ഇരിങ്ങാലക്കുട സ്വദേശി കെ.ബാബുവിനും സഹോദരങ്ങള്‍ക്കുമെതിരെയാണ് പരാതി. 

32 പേരുടെ പരാതിയില്‍ സ്ഥാപനത്തിന്റെ നടത്തിപ്പുകാരായ ബിബിന്‍ കെ.ബാബു, ഭാര്യ ജയ്ത വിജയന്‍, സഹോദരന്‍ സുബിന്‍ കെ.ബാബു, ലിബിന്‍ എന്നിവരുടെ പേരില്‍ പൊലീസ് കേസുകള്‍ റജിസ്റ്റര്‍ ചെയ്തു. അതേസമയം ബിബിന്‍. കെ. ബാബുവും സഹോദരങ്ങളും ഒളിവിലാണ്. ഇവര്‍ക്കായി അന്വേഷണം ഊര്‍ജ്ജിതമാക്കി. 

ട്രേഡിങിലൂടെ അമിതമായ പലിശ നല്‍കാമെന്ന് വിശ്വസിപ്പിച്ചുകൊണ്ട് വലിയ സാമ്പത്തിക നിക്ഷേപം സ്വീകരിക്കുകയായിരുന്നു ബില്യണ്‍ ബീസ് എന്ന സ്ഥാപനം. 2020മുതലാണ് തട്ടിപ്പ് ആരംഭിച്ചത്. ഇവരുടെ വാഗ്ദാനത്തില്‍ വീണ് നിരവധിപേര്‍ നിക്ഷേപം നടത്തി. ഇവര്‍ക്ക് ആദ്യത്തെ അഞ്ച് മാസത്തോളം സ്ഥാപനം നല്‍കാമെന്ന് പറഞ്ഞ പലിശ ലഭിച്ചിരുന്നു. പിന്നീട് ലാഭവിഹിതം മുടങ്ങിയതോടെ നിക്ഷേപകര്‍ പണം തിരികെ ചോദിച്ചു എത്തിയപ്പോള്‍ ഉടമകള്‍ ഭീഷണിപ്പെടുത്തിയെന്നും പിന്നീട് ഇവര്‍ വിദേശത്തേക്ക് കടന്നെന്നും പരാതിക്കാര്‍ പറയുന്നു.