റിയാദ്: ഈ വർഷം അവസാനത്തോടെ റിയാദ് എയർ പ്രവർത്തനസജ്‌ജമാകും. സഊദി അറേബ്യയുടെ രണ്ടാം ദേശീയ എയർലൈൻ ആണ് റിയാദ് എയർ. സഊദിക്ക് അകത്തും പുറത്തും യാത്രക്കാരെ സ്വാഗതം ചെയ്യാൻ എയർലൈൻ സന്നദ്ധമാണെന്ന് സിഇഒ ടോണി ഡൗഗ്ലസ് വ്യക്തമാക്കി.

മിയാമിയിൽ വച്ച് നടന്ന എഫ്‌ഐഐ പ്രയോറിറ്റി ഉച്ചകോടിയിലാണ് റിയാദ് എയറിൻ്റെ പ്രവർത്തന സന്നദ്ധത വ്യക്തമാക്കിയത്. എന്നാൽ, എവിടേക്കാണ് റിയാദ് എയറിൻ്റെ ഉദ്ഘാടന സർവിസെന്ന് അദ്ദേഹം വെളിപ്പെടുത്തിയില്ല. 2030നകം മിഡിൽ ഈസ്റ്റിലെയും 6 ഭൂഖണ്ഡങ്ങളിലെയും 100 രാജ്യാന്തര നഗരങ്ങളിൽ സർവിസ് നടത്തുകയാണ് റിയാദ് എയർ ലക്ഷ്യമിടുന്നതെന്നും അദ്ദേഹം പറഞ്ഞു.

60 എയർബസ് എ32നിയോസ്, 72 ബോയിങ് 787 എസ് എന്നിങ്ങനെ 132 വിമാനങ്ങൾക്ക് റിയാദ് എയർ കഴിഞ്ഞ വർഷം ഓർഡർ നൽകിയിരുന്നു. ഇത് കൂടാതെ വൈഡ്ബോഡി എയർക്രാഫ്റ്റിന് ഓർഡർ നൽകുന്നത് സംബന്ധിച്ച ചർച്ചകളും നടക്കുകയാണ്. തുടക്കത്തിൽ തന്നെ പ്രീമിയം ഗ്ലോബൽ എയർലൈനായി മാറാനുള്ള ലക്ഷ്യവുമായി എൽഐവി ഗോൾഫിൻ്റെ ആഗോള എയർലൈൻ പങ്കാളിയായുള്ള കരാർ അടക്കം നിരവധി വൻകിട പങ്കാളിത്ത കരാറുകളിലാണ് കമ്പനി ഒപ്പുവച്ചത്. 

സഊദിയിലേക്കുള്ള കണക്‌ടിവിറ്റിയും ടൂറിസവും മെച്ചപ്പെടുത്തുകയാണ് എയർലൈനിൻ്റെ പ്രധാന ലക്ഷ്യങ്ങളിലൊന്ന്. കഴിഞ്ഞ വർഷം ഏറ്റവുമധികം ആളുകൾ ഗൂഗിളിൽ തിരഞ്ഞ രണ്ടാമത്തെ ടൂറിസം കേന്ദ്രമാണ് സഊദി. അൽ ഉല, ദിരിയ എന്നിവിടങ്ങളിലേക്ക് കൂടുതൽ സഞ്ചാരികളെ ആകർഷിക്കാനും ഇത് ലക്ഷ്യമിടുന്നു.

ഏറ്റവും മികച്ച രീതിയിൽ പുതിയ ഫാഷനും ഗ്ലാമറും സ്റ്റൈലും എല്ലാം ഒത്തുചേർന്നതാണ് റിയാദ് എയറിലെ കാബിൻ ക്രുവിൻ്റെ വേഷവിധാനം. കൂടാതെ, ആർട്ടിഫിഷ്യൽ ഇന്റലിജൻസിലും വ്യക്തിഗത സേവനത്തിലും അധിഷ്ഠിതമായി കൂടുതൽ മികച്ച യാത്രാനുഭവം യാത്രക്കാർക്ക് ഉറപ്പാക്കാനും എയർലൈൻ ലക്ഷ്യമിടുന്നു.

 Riyadh Air, Saudi Arabia's new national carrier, is set to launch operations by the end of this year, marking a significant milestone in the kingdom's aviation sector.