ദുബൈ: ആഡംബര ബോട്ടുകളുടെ ആഗോള കേന്ദ്രവും സമുദ്ര വിനോദസഞ്ചാരത്തിൻ്റെ മുൻനിര കേന്ദ്രവുമായാണ് രാജ്യാന്തര ബോട്ട് പ്രദർശനം ദുബൈയെ അടിവരയിടുന്നതെന്ന് യുഎഇ വൈസ് പ്രസിഡന്റും പ്രധാനമന്ത്രിയും ദുബൈ ഭരണാധികാരിയുമായ ഷെയ്ഖ് മുഹമ്മദ് ബിൻ റാഷിദ് അൽ മക്‌തൂം വ്യക്തമാക്കി. 

ലോകോത്തര അടിസ്‌ഥാന സൗകര്യങ്ങളും അത്യാധുനിക സംവിധാനങ്ങളും ഉള്ളതുകൊണ്ട് തന്നെ ആഡംബര ബോട്ടുകളും രാജ്യാന്തര ക്രൂയിസ് കപ്പലുകളും സന്ദർശിക്കുന്നതിനുള്ള ഒരു പ്രധാന കേന്ദ്രമായി ദുബൈ മാറിയിരിക്കുന്നുവെന്ന് അദ്ദേഹം കൂട്ടിച്ചേർത്തു. ദുബൈ വേൾഡ് ട്രേഡ് സെൻ്റർ (ഡിഡബ്ല്യുടിസി) ഹാർബറിൽ സംഘടിപ്പിച്ച 31 -ാമത് ദുബൈ രാജ്യാന്തര ബോട്ട് ഷോ സന്ദർശിക്കുകയായിരുന്നു അദ്ദേഹം.

60ലേറെ രാജ്യങ്ങളെ പ്രതിനിധീകരിച്ച് 1,000ലേറെ ബ്രാൻഡുകളും 200ലേറെ ബോട്ടുകളും വാട്ടർക്രാഫ്റ്റുകളും നാളെ സമാപിക്കുന്ന ഈ മേളയുടെ സവിശേഷതയാണ്. ദുബൈ സ്പോർട്‌സ് കൗൺസിൽ ചെയർമാൻ ഷെയ്ഖ് മൻസൂർ ബിൻ മുഹമ്മദ് ബിൻ റാഷിദ് അൽ മകം, ഷെയ്ഖ് മുഹമ്മദിനോടൊപ്പം ഉണ്ടായിരുന്നു.

പ്രദർശനത്തിൽ പങ്കെടുക്കുന്ന രാജ്യാന്തര ബ്രാൻഡുകളെയും ആദ്യമായി പ്രദർശനത്തിനെത്തിയവരെയും ഷെയ്ഖ് മുഹമ്മദ് സ്വാഗതം ചെയ്തു. ദുബൈ ഇക്കണോമി ആൻഡ് ടൂറിസം വകുപ്പ് ഡയറക്‌ടർ ജനറലും ദുബൈ വേൾഡ് ട്രേഡ് സെൻ്റർ അതോറിറ്റിയുടെ ഡയറക്ടർ ജനറലുമായ ഹിലാൽ സയീദ് അൽ മർറി, ദുബൈ സ്പോർട്സ് കൗൺസിൽ സെക്രട്ടറി ജനറലും ഡിഐബിഎസ് സീനിയർ അഡ്വൈസറുമായ സയീദ് ഹരേബ് എന്നിവരോടൊപ്പം യുഎഇയിലെ പ്രമുഖ ആഡംബര നൗക നിർമാതാക്കളായ ഗൾഫ് ക്രാഫ്റ്റ് സ്റ്റാൻഡും മറ്റു കേന്ദ്രങ്ങളും ഷെയ്ഖ് മുഹമ്മദ് സന്ദർശിച്ചു.

ദുബൈ ഇന്റർനാഷനൽ ബോട്ട് ഷോ 2025 ആഗോള നാവിക സമൂഹത്തിന് ഏറ്റവും പുതിയതും ആഡംബരപൂർണവുമായ ബോട്ട്, ബോട്ട് ഡിസൈനുകൾ പ്രദർശിപ്പിക്കുന്നു. കൂടാതെ, ആഡംബര നൗകകളുടെ വിൽപനയും വാങ്ങലും സുഗമമാക്കുകയും, വാട്ടർഫ്രണ്ട് റിയൽ എസ്‌റ്റേറ്റ് പ്രോത്സാഹിപ്പിക്കുകയും, വ്യവസായത്തിലെ അത്യാധുനിക പുതുമകൾ ഉയർത്തിക്കാട്ടുകയും ചെയ്യുന്ന ഒരു സവിശേഷ പ്ലാറ്റ്ഫോം ആയിരിക്കുന്നു.

Sheikh Mohammed bin Rashid Al Maktoum, Vice President and Prime Minister of the UAE and Ruler of Dubai, visited the Dubai International Boat Show, showcasing the latest yachts, boats, and marine innovations.