തിരുവനന്തപുരം: സെക്രട്ടേറിയറ്റിനു മുന്നില്‍ പണിമുടക്കി സമരം ചെയ്യുന്ന ആശവര്‍ക്കര്‍മാരുടെ കണക്കെടുത്ത് ആരോഗ്യവകുപ്പ്. പതിമൂന്നാം ദിവസത്തിലേക്ക് എത്തിയ സമരം കൂടുതല്‍ ശക്തമാവുകയും ദേശീയതലത്തില്‍ വരെ ശ്രദ്ധ നേടുകയും ചെയ്ത വേളയിലാണ് സര്‍ക്കാരിന്റെ നടപടി. ജോലിക്കു പോകാതെ സമരത്തിനെത്തിയവരുടെ കണക്കെടുക്കാനാണ് ആരോഗ്യവകുപ്പിന്റെ നിര്‍ദേശം. കഴിഞ്ഞ ദിവസം ഡിഎംഒ മാരുടെ നേതൃത്വത്തില്‍ ജില്ലകളില്‍ ഗൂഗിള്‍ഫോം വഴിയാണ് കണക്കെടുത്ത് തുടങ്ങിയത്. 

എന്നാല്‍ സര്‍ക്കാരിന്റെ ഭീഷണിയുടെ തുടര്‍ച്ചയാണെന്നും കണക്കെടുത്ത് ഭയപ്പെടുത്തിയാലും സമരത്തില്‍ നിന്നു പിന്‍മാറില്ലെന്നും സമരസമിതി നേതാക്കള്‍ പറഞ്ഞു. രണ്ടാഴ്ചയോളമായി സെക്രട്ടേറിയറ്റിനു മുന്നില്‍ സമരം ചെയ്യുന്ന ആശവര്‍ക്കര്‍മാരോട് സംസാരിക്കാന്‍ സര്‍ക്കാര്‍ ഇതുവരെ തീരുമാനമെടുത്തിട്ടില്ല. ഇവരെ ചര്‍ച്ചയ്ക്കു വിളിക്കുകയോ ചെയ്തിട്ടില്ല. സമരം ചര്‍ച്ചയാകുന്ന വേളയില്‍ പ്രതിപക്ഷസംഘടനകള്‍ തെരുവിലിറങ്ങി തന്നെ സമരത്തിനു പിന്തുണനല്‍കുമെന്നും അറിയിച്ചിട്ടുണ്ട്.

മാത്രമല്ല, സമരം ദേശീയ ശ്രദ്ധ നേടിയിട്ടും മുഖ്യമന്ത്രി ഇടപെടാത്തതിനെ സിപിഎം നേതാവായ സി ദിവാകരന്‍ വിമര്‍ശിച്ചു. മുഖ്യമന്ത്രി ഇടപെട്ടാല്‍ അഞ്ചു മിനിറ്റ് കൊണ്ട് തീര്‍ക്കാവുന്ന സമരമാണ് ആശവര്‍ക്കര്‍മാരുടേതെന്നും ഉടന്‍തന്നെ ഇതില്‍ ഇടപെടണമെന്നും ദിവാകരന്‍ പറഞ്ഞു. എന്നാല്‍ സര്‍ക്കാര്‍ വിഷയത്തില്‍  ഇടപെട്ടിട്ടുണ്ടെന്നാണ് സിപിഐയുടെ മന്ത്രി ചിഞ്ചുറാണി പ്രതികരിച്ചത്.  

ഇവരുടെ പ്രശ്‌നങ്ങള്‍ പരിഹരിക്കാന്‍ കേന്ദ്ര-സംസ്ഥാന സര്‍ക്കാരുകള്‍ സഹകരിച്ചു പ്രവര്‍ത്തിക്കണമെന്ന് ദേശീയ മനുഷ്യാവകാശ കമ്മീഷനും ആവശ്യപ്പെട്ടു. ഓണറേറിയം കുടിശ്ശിക അനുവദിച്ച സര്‍ക്കാര്‍ തങ്ങളുടെ മുഴുവന്‍ ആവശ്യങ്ങളിലും അനുകൂലമായ തീരുമാനം ഉണ്ടാക്കണമെന്നതാണ് ആശവര്‍ക്കര്‍മാരുടെ നിലപാട്.