തിരുവനന്തപുരം: സര്‍ക്കാരും മന്ത്രിമാരുമടക്കം തള്ളിപ്പറഞ്ഞിട്ടും തളരാതെ ആശവര്‍ക്കര്‍മാരുടെ സമരം 13ാം ദിവസത്തിലേക്ക്. ഈ സമരത്തിന് പിന്തുണയും ഏറിവരുകയാണ്. വെള്ളിയാഴ്ചയാരംഭിച്ച സംസ്ഥാന വ്യാപകമായി തുടങ്ങിയ അനിശ്ചിതകാല പണിമുടക്ക് പൊളിക്കാന്‍ സര്‍ക്കാരും സിഐടിയുവും ശ്രമിക്കുകയാണ്. എന്നാല്‍ ഞങ്ങള്‍ക്ക് ജനങ്ങളുടെ പിന്തുണ ഏറുകയാണെന്നാണ് കോഡിനേറ്റര്‍ എസ് മിനി പറയുന്നത്.

വലിയ പിന്തുണയാണ് എല്ലാവരില്‍ നിന്നും ലഭിക്കുന്നത്. വെള്ളിയാഴ്ച ഓട്ടോ ഡ്രൈവര്‍മാരാണ് കഞ്ഞിവയ്ക്കാന്‍ അരിയും വിറകും നല്‍കിയത്. വിവിധരാഷ്ട്രീയപാര്‍ട്ടി നേതാക്കളും പിന്തുണച്ചു. മാത്രമല്ല വഴിയാത്രക്കാരടക്കം സമൂഹത്തിന്റെ നാനാതുറയിലുള്ളവരും പിന്തുണ നല്‍കുന്നുവെന്ന് മിനി പറഞ്ഞു. ഓണറേറിയം കുടിശ്ശിക അനുവദിച്ച സര്‍ക്കാര്‍ തങ്ങളുടെ മുഴുവന്‍ ആവശ്യങ്ങളിലും അനുകൂലമായ തീരുമാനം ഉണ്ടാവണമെന്ന നിലപാടിലാണ്.

ഗതികെട്ട് സമരമുഖത്തേക്കിറങ്ങിയ ആശവര്‍ക്കര്‍മാരുടെ ന്യായമായ ആവശ്യങ്ങളോട് മുഖംതിരിക്കുന്ന ഇടതു സര്‍ക്കാര്‍ നിലപാട് പ്രതിഷേധാര്‍ഹമാണെന്ന് വിമന്‍ ഇന്ത്യ മൂവ്‌മെന്റ് പ്രസ്താവനയില്‍ അറിയിച്ചു. ആശവര്‍ക്കര്‍മാരെ കൈവിട്ടത് ക്രൂരമായി പോയെന്നും തങ്ങളുടെ പിന്തുണ സമരത്തിനുണ്ടെന്നും സമരവേദി സന്ദര്‍ശിച്ച കെപിസിസി പ്രസിഡന്റ് സുധാകരനും പറഞ്ഞു.

ഡല്‍ഹിയില്‍ ബിജെപിക്കും സിപിഎമ്മിനും ഇടയില്‍ പാലം പണിയുന്ന പ്രഫ. കെവി തോമസിന്റെ യാത്രാബത്ത അഞ്ചു ലക്ഷം രൂപയില്‍ നിന്ന് 11.31 ലക്ഷമാക്കി ഉയര്‍ത്തിയ മുഖ്യമന്ത്രി പാവപ്പെട്ട ആശാവര്‍ക്കര്‍മാരുടെ 7,000 രൂപയുടെ ഓണറേറിയം വര്‍ധിപ്പിക്കണമെന്ന ആവശ്യം തള്ളക്കളയുന്നത് ക്രൂരതയാണെന്ന് അദ്ദേഹം പറഞ്ഞു. ആശവര്‍ക്കര്‍മാരുടെ ആവശ്യം ന്യായമാണെന്നും അവരുടെ ആവശ്യങ്ങള്‍ പരിഹരിക്കണമെന്നും സിപിഐ സംസ്ഥാനസെക്രട്ടറി ബിനോയ് വിശ്വവും പറഞ്ഞു.