ദോഹ: ഫ്രഞ്ച് സൂപ്പർ കപ്പ് മത്സരത്തിനായി ഫുട്ബോൾ താരങ്ങൾ ദോഹയിലെത്തി. ലോകകപ്പ് വേദികളിലൊന്നായിരുന്ന 974 സ്‌റ്റേഡിയത്തിൽ ഞായറാഴ്‌ച രാത്രി 7.30ന് ആണ് മത്സരം.

ഫ്രഞ്ച് ലീഗിലെ പ്രമുഖ ടീമുകളായ പിഎസ്‌ജി -എ. എസ് മൊണാക്കോ താരങ്ങളാണ് ഇന്നലെ ദോഹയിലെത്തിയത്. രാത്രി വൈകി ഹമദ് രാജ്യാന്തര വിമാനത്താവളത്തിലെത്തിയ ടീമംഗങ്ങൾ ഇന്നും നാളെയും പരിശീലനത്തിരക്കിലാകും.

2022 ഖത്തർ ലോകകപ്പിൽ മികച്ച പ്രകടനം കാഴ്ചവച്ച മാർക്വിനോസ്, ഔസ്‌മാൻ ഡെംബെലെ, ലീ കാങ്-ഇൻ, മൊറോക്കൻ താരം അഷ്റഫ് ഹക്കിമി തുടങ്ങിയ താരങ്ങൾ പി എസ് ജിക്കായി കളത്തിൽ ഇറങ്ങുമ്പോൾ ജാപ്പനീസ് താരം തകുമി മിനാമിനോയും മൊറോക്കൻ താരം എലീസെ ബെൻ സെഗീറും ഉൾപ്പെടുന്ന കരുത്തരുടെ നിരയെയാണ് എഎസ് മൊണാക്കോ കളത്തിലിറക്കുന്നത്.

ഫുട്ബോൾ ആരാധകർക്കായി ഇന്ന് വൈകിട്ട് 3.00 മുതൽ 6 മണി വരെ സിറ്റി സെന്ററിൽ ട്രോഫി പ്രദർശനം സംഘടിപ്പിച്ചിരുന്നു. ജേതാക്കൾക്ക് നൽകുന്ന ട്രോഫി അടുത്തു കാണാനും, ഒപ്പം നിന്ന് ചിത്രങ്ങളെടുക്കാനും ഇത് ആരാധകർക്ക് അവസരമൊരുക്കി. മത്സരടിക്കറ്റുകൾ https://www.roadtoqatar.qa/enഎന്ന വെബ്സൈറ്റിലൂടെ സ്വന്തമാക്കാം. ഒരാൾക്ക് പരമാവധി പത്ത് ടിക്കറ്റ് വരെ വാങ്ങാം.

The stars of PSG and Monaco have arrived in Doha, Qatar, ahead of their highly-anticipated French Super Cup clash.