ലണ്ടൻ: ഇംഗ്ലീഷ് പ്രീമിയർ ലീഗിലെ ത്രില്ലർ പോരാട്ടമായി ലിവർപൂൾ-മാഞ്ചസ്റ്റർ യുണൈറ്റഡ് പോരാട്ടം സമനിലയിൽ പിരിഞ്ഞു. ലിവർപൂളിന്റെ തട്ടകമായ ആൻഫീൽഡിൽ നടന്ന മത്സരത്തിൽ ഇരുടീമുകളും രണ്ട് ഗോളുകൾ വീതം നേടിക്കൊണ്ട് പോയിന്റുകൾ പങ്കുവെക്കുകയായിരുന്നു. മത്സരത്തിൽ ലിവർപൂളിനായി സൂപ്പർതാരം മുഹമ്മദ് സലാഹ് ഗോൾ നേടിയിരുന്നു. പ്രീമിയർ ലീഗിലെ ഈ സീസണിലെ സലാഹിന്റെ 18ാം ഗോൾ ആയിരുന്നു ഇത്. ഈ ഗോളിന് മറ്റൊരു പ്രത്യേകത കൂടിയുണ്ട്. 

ഇംഗ്ലീഷ് പ്രീമിയർ ലീഗിൽ സലാഹ് നേടുന്ന 175ാമത്തെ ഗോളായിരുന്നു ഇത്. ഇതോടെ ഇത്ര തന്നെ ഗോളുകൾ നേടിയ ആഴ്സണലിന്റെ മുൻ ഫ്രഞ്ച് താരം തിയറി ഹെൻറിയുടെ ഗോളുകളുടെ എണ്ണത്തിനൊപ്പമെത്താനും സലാഹിന് സാധിച്ചു. എന്നാൽ സലാഹിനെക്കാൾ കുറവ് മത്സരങ്ങൾ കളിച്ചുകൊണ്ടാണ് ഹെൻറി ഇത്രയധികം ഗോളുകൾ നേടിയത്. 258 മത്സരങ്ങളിൽ നിന്നുമാണ് ഹെൻറി 175 ഗോളുകൾ നേടിയത്. 282 മത്സരങ്ങളിൽ നിന്നാണ് സലാഹ് ഇത്ര ഗോളുകൾ നേടിയത്. 

സലാഹിന് പുറമെ മത്സരത്തിൽ കോഡി ഗാക്പോ ആണ് ഇവർപൂളിനായി ഗോൾ സ്കോര്ട് ചെയ്തത്. മാഞ്ചസ്റ്റർ യൂണൈറ്റഡിനായി ലിസാൻഡ്രോ മാർട്ടിനസ്, അമദ് ഡയല്ലോ എന്നിവരുമാണ് ഗോളുകൾ നേടിയത്. സമനിലയോടെ 46 പോയിന്റോടെ ഒന്നാം സ്ഥാനത്ത് തന്നെയാണ് ലിവർപൂൾ ഉള്ളത്. 

19 മത്സരങ്ങളിൽ നിന്നായി 14 വിജയവും നാല് സമനിലയും ഒരു തോൽവിയും ആണ് ലിവർപൂൾ ഇതുവരെ നേടിയത്. പോയിന്റ് പട്ടികയിൽ പതിമൂന്നാം സ്ഥാനത്താണ് മാഞ്ചസ്റ്റർ യുണൈറ്റഡ്‌ ഉള്ളത്. 20 മത്സരങ്ങളിൽ നിന്നും ആറ് വിജയവും അഞ്ചു സമനിലയും ഒമ്പത് തോൽവിയും അടക്കം 23 പോയിന്റാണ് മാഞ്ചസ്റ്റർ യുണൈറ്റഡിന്റെ കൈവശമുള്ളത്.