കൊച്ചി: കേരളത്തിന്റെ മാറുന്ന വ്യാവസായിക അന്തരീക്ഷത്തിന്റെ നേര്‍ക്കാഴ്ചയായി മാറുകയാണ് ഇന്‍വെസ്റ്റ് കേരളയുടെ പ്രദര്‍ശനം. പറക്കുകയും മുങ്ങുകയും ചെയ്യുന്ന ഡ്രോണുകള്‍ മുതല്‍ മാന്‍ഹോളിലെ ജോലികള്‍ ചെയ്യാവുന്ന റോബോട്ടുകള്‍ വരെ നിര്‍മിക്കുന്ന സംരംഭങ്ങള്‍ കേരളത്തിലുണ്ടെന്നത് കേരളത്തിന്റെ സ്റ്റാര്‍ട്ടപ്പ് ആവാസവ്യവസ്ഥയുടെ സാക്ഷ്യം കൂടിയാകുന്നു.
ആകെ 105 പ്രദര്‍ശന സ്റ്റാളുകളാണ് ലുലു ബോള്‍ഗാട്ടി ഇന്റര്‍നാഷണല്‍ കണ്‍വന്‍ഷന്‍ സെന്ററില്‍ നടക്കുന്ന ഇന്‍വെസ്റ്റ് കേരള ദ്വിദിന ഉച്ചകോടിയില്‍ ഒരുക്കിയിട്ടുള്ളത്.

കേരളത്തിന്റെ വ്യവസായ മേഖലയിലെ 22 മുന്‍ഗണനാ മേഖലകളെ പ്രത്യേകം എടുത്തുകാട്ടുന്ന പ്രദര്‍ശനം വൈവിധ്യം കൊണ്ടും അവതരണം കൊണ്ടും ശ്രദ്ധയാകര്‍ഷിക്കുന്നു. സംസ്ഥാനത്തിന്റെ അഭിമാന സ്റ്റാര്‍ട്ടപ്പുകളായ ജെന്‍ റോബോട്ടിക്‌സ്, ഐറോവ് ടെക്‌നോളജീസ് എന്നിവയുടെ സ്റ്റാളുകള്‍ പ്രദര്‍ശനത്തിനുണ്ട്. മാന്‍ഹോളുകള്‍ വൃത്തിയാക്കുന്നതില്‍ ലോകത്ത് വിപ്ലവകരമായ മാറ്റം സൃഷ്ടിച്ച ബാന്‍ഡികൂട്ട് റോബോട്ടാണ് പ്രദര്‍ശനത്തിലെ താരം.  സംസ്ഥാനത്തെ വിവിധ തദ്ദേശസ്ഥാപനങ്ങള്‍ റോബോട്ടിനായി ഓര്‍ഡര്‍ നല്‍കിയതായി ബാന്‍ഡിക്യൂട്ട് റോബോട്ടിന്റെ വക്താക്കള്‍ പറഞ്ഞു.

300 മീറ്റര്‍ ആഴത്തില്‍ വരെ പോയി സമുദ്രാന്തര ഗവേഷണം നടത്താന്‍ സഹായിക്കുന്ന ഡ്രോണായ ഐറോവ് ട്യൂണയും പ്രദര്‍ശനത്തിന് ഒരുക്കിയിട്ടുണ്ട്. അണക്കെട്ടുകള്‍ തുടങ്ങി എണ്ണപര്യവേഷണം, നാവികസേനയ്ക്ക് വരെ ഈ ഡ്രോണ്‍ ഉപയോഗിച്ച് വരുന്നു. 2017ല്‍ തുടങ്ങിയ സംരംഭം ഗള്‍ഫ് രാജ്യങ്ങളിലേക്കുള്‍പ്പെടെ കയറ്റുമതി ചെയ്യുന്നുണ്ട്.

യു.കെ അടക്കമുള്ള രാജ്യങ്ങളിലേക്ക് കയറ്റുമതി ഓര്‍ഡര്‍ ലഭിച്ച കാര്‍ഷികാവശ്യ ഡ്രോണ്‍ നിര്‍മാതാക്കളായ ഫ്യൂസലേജ് ഇനോവേഷനും ഉല്‍പന്നങ്ങള്‍ പ്രദര്‍ശിപ്പിച്ചിട്ടുണ്ട്. നിലവില്‍ കാര്‍ഷിക വിളകള്‍ക്കായി പ്രവര്‍ത്തിപ്പിക്കുന്ന ഡ്രോണുകള്‍ മത്സ്യകൃഷിക്ക് കൂടി ഉപയോഗിക്കാവുന്നതരത്തില്‍ രൂപകല്‍പന മാറ്റാനും കഴിയുമെന്ന് സംരംഭത്വത്തിന് നേതൃത്വം കൊടുക്കുന്ന അമല്‍ പറഞ്ഞു.