നാഗ്പൂർ:  ഇംഗ്ലണ്ടിനെതിരായ മൂന്ന് ഏകദിന മത്സരങ്ങളുടെ പരമ്പരക്കായുള്ള തയ്യാറെടുപ്പിലാണ് ഇന്ത്യൻ ക്രിക്കറ്റ് ടീം. പരമ്പരയിലെ ആദ്യ മത്സരം നാളെ നാഗ്പൂരിലാണ് നടക്കുന്നത്. ഇപ്പോൾ പരമ്പരക്ക് മുന്നോടിയായി ഇന്ത്യൻ ക്രിക്കറ്റ് ടീമിന്റെ പ്രതീക്ഷകളെക്കുറിച്ച് സംസാരിക്കുകയാണ് ഇന്ത്യൻ നായകൻ രോഹിത് ശർമ്മ. ക്രിക്കറ്റിൽ ഉയർച്ച താഴ്ചകൾ ഉണ്ടാകുമെന്നും എന്നാൽ ഓരോ പരമ്പരയെയും പുതിയ രീതിയിലാണ് കാണുന്നതെന്നുമാണ് രോഹിത് പറഞ്ഞത്. മത്സരത്തിന് മുന്നോടിയായി മാധ്യമങ്ങളോട് സംസാരിക്കുകയായിരുന്നു ഇന്ത്യൻ നായകൻ. 

'ഇത് വ്യത്യസ്തമായ ഒരു ഫോർമാറ്റാണ്. ഒരു ക്രിക്കറ്റ് കളിക്കാരെന്ന നിലയിൽ ഓരോ ആളുകൾക്കും ഉയർച്ച താഴ്ചകൾ ഉണ്ടാകുമെന്ന് ഞങ്ങൾക്കറിയാം. ഇത് പോലെ പല കാര്യങ്ങളും എന്റെ കരിയറിൽ ഞാൻ ഒരുപാട് കാര്യങ്ങൾ നേരിട്ടിട്ടുണ്ട്. അതുകൊണ്ട് തന്നെ ഇതെനിക്ക് പുതിയ ഒരു കാര്യമല്ല. എല്ലാ ദിവസവും ഒരു പുതിയ ദിവസമാണെന്നും എല്ലാ പരമ്പരയും ഒരു പുതിയ പരമ്പരയാണെന്നും ഞങ്ങൾക്കറിയാം. മൂന്ന് ഏകദിനങ്ങളും ചാമ്പ്യൻസ് ട്രോഫിയും വരാനിരിക്കുന്നുണ്ട്. ഈ സാഹചര്യത്തിൽ എന്റെ ഭാവി പദ്ധതികളെക്കുറിച്ച് സംസാരിക്കുന്നത് എങ്ങനെയാണ്. പല റിപ്പോർട്ടുകളും വരുന്നുണ്ട്. ഈ റിപ്പോർട്ടുകൾ എന്താണെന്ന് വ്യക്തമാക്കാൻ എനിക്ക് കഴിയില്ല. എനിക്ക് ഇപ്പോൾ ഈ മൂന്ന് മത്സരങ്ങളും പിന്നീട് നടക്കുന്ന ചാമ്പ്യൻസ് ട്രോഫിയും വളരെ പ്രധാനമാണ്. എന്റെ ശ്രദ്ധ ഈ മത്സരങ്ങളിലാണ്,' രോഹിത് ശർമ്മ പറഞ്ഞു. 

സമീപകാലങ്ങളിൽ രോഹിത് ഇന്ത്യൻ ടീമിനൊപ്പം മോശം പ്രകടനങ്ങളാണ്‌ നടത്തിക്കൊണ്ടിരിക്കുന്നത്. അടുത്തിടെ അവസാനിച്ച ബോർഡർ-ഗവാസ്കർ ട്രോഫിയിൽ  മൂന്ന് ടെസ്റ്റ് മത്സരങ്ങളിൽ നിന്ന് രോഹിതിന് 31 റൺസ് മാത്രമേ നേടാനായുള്ളൂ. പിന്നീട് രഞ്ജി ട്രോഫിയിലും താരം നിരാശപ്പെടുത്തി. എന്നാൽ ഏകദിന പരമ്പരയിൽ രോഹിത് മികച്ച പ്രകടനം നടത്തുമെന്നുതന്നെയാണ് ആരാധകർ പ്രതീക്ഷിക്കുന്നത്.