കൊല്‍ക്കത്ത: വിദ്യാര്‍ഥിയെ വിവാഹം ചെയ്യുന്ന വിഡിയോ വൈറലായതിനു പിന്നാലെ രാജിക്കൊരുങ്ങി അധ്യാപിക. പശ്ചിമ ബംഗാളിലെ സര്‍ക്കാര്‍ നിയന്ത്രണത്തിലുള്ള ഒരു സര്‍വകലാശാലയിലാണ് സംഭവം നടന്നത്. ഒന്നാം വര്‍ഷ വിദ്യാര്‍ഥിയെ ക്ലാസ്മുറിയില്‍ വച്ച് വിവാഹം കഴിക്കുന്ന കോളജ് അധ്യാപികയുടെ വിഡിയോ ഒരാഴ്ച മുന്‍പ് വൈറലായിരുന്നു. പിന്നാലെയാണ് അധ്യാപിക രാജി സന്നദ്ധത അറിയിച്ചത്. 

നാദിയിലെ മൗലാന അബുള്‍ കലാം ആസാദ് യൂണിവേഴ്സിറ്റി ഓഫ് ടെക്നോളജിയിലെ അപ്ലൈഡ് സൈക്കോളജി വിഭാഗം മുന്‍ മേധാവി പായല്‍ ബാനര്‍ജിയും ഒരു വിദ്യാര്‍ഥിയുമായിരുന്നു വൈറലായ വിവാഹ വീഡിയോയില്‍ ഉണ്ടായിരുന്നത്. പ്രൊജക്ടിന്റെ ഭാഗമായിട്ടാണ് വിവാഹം നടന്നതെന്ന് പറഞ്ഞ അധ്യാപികയോട് നിര്‍ബന്ധിത അവധിയില്‍ പ്രവേശിക്കാനും കോളജ് അധികൃതര്‍ ആവശ്യപ്പെട്ടിരുന്നു. ഈ വിഡിയോ വൈറലായതിനു പിന്നാലെ കടുത്ത മാനസിക സമ്മര്‍ദ്ദത്തിലായ അധ്യാപിക രാജിസന്നദ്ധത അറിയിച്ചതായാണ് പുതിയ റിപ്പോര്‍ട്ട്.

നിലവിലെ സാഹചര്യത്തില്‍ കോളജില്‍ തുടരാന്‍ ബുദ്ധിമുട്ടുണ്ടെന്നു കാണിച്ച് അധ്യാപിക ഇമെയില്‍ സന്ദേശമയച്ചതായി അടുത്ത വൃത്തങ്ങള്‍ സൂചിപ്പിക്കുന്നു. ഇത്രയും വര്‍ഷം കോളജില്‍ ജോലി ചെയ്യാന്‍ നല്‍കിയ അവസരത്തിനു നന്ദിയെന്നും അധ്യാപിക മെയിലില്‍ വ്യക്തമാക്കുന്നു. 

അധ്യാപിക ഹിന്ദു ബംഗാളി വധുവിനെപ്പോലെ ഒരുങ്ങി വിദ്യാര്‍ഥിക്കു സമീപം നില്‍ക്കുന്നതും ഇവര്‍ പൂമാല പരസ്പരം കഴുത്തിലണിയുന്നതും വിദ്യാര്‍ഥി അധ്യാപികയുടെ നെറ്റിയില്‍ സിന്ദൂരം ചാര്‍ത്തുന്നതുമാണ് വിഡിയോയിലുള്ളത്. വീഡിയോ സാമൂഹിക മാധ്യമങ്ങളില്‍ വലിയ രീതിയില്‍ പ്രചരിച്ചതോടെ വലിയ വിവാദങ്ങളിലേക്ക് ഇത് വഴിമാറി. ഇതോടെ സംഭവം അന്വേഷിക്കാന്‍ സര്‍വകലാശാല മൂന്നംഗ പാനലിനെ ചുമതലപ്പെടുത്തുകയും ചെയ്തു. 

പ്രൊജക്ടുമായി ബന്ധപ്പെട്ട് ക്ലാസില്‍ നടത്തിയ ഒരു പ്രവര്‍ത്തി എന്നാണ് അധ്യാപിക നല്‍കിയിരിക്കുന്ന വിശദീകരണം. അനുചിതമായി ഒന്നും നടന്നിട്ടില്ല. തീര്‍ത്തും പഠനസംബന്ധമായി നടന്ന ഒരു കാര്യമാണിതെന്നും ഡിപ്പാര്‍ട്ട്‌മെന്റിനെ മോശമായി ചിത്രീകരിക്കാന്‍ വീഡിയോ മനപൂര്‍വം പുറത്തുവിട്ടതാണെന്നും അധ്യാപിക ആരോപിച്ചു.