റിയാദ്: മേജർ സോക്കർ ലീഗ് സഊദി പ്രൊ ലീഗിനേക്കാൾ മികച്ചതാണെന്ന് പറഞ്ഞിരിക്കുകയാണ് പോർച്ചുഗീസ് സൂപ്പർതാരം ക്രിസ്റ്റ്യാനോ റൊണാൾഡോ. ലാ സെക്സ്‌റ്റയ്ക്ക് നൽകിയ അഭിമുഖത്തിലാണ് റൊണാൾഡോ നിലവിൽ താൻ കളിക്കുന്ന ലീഗിന്റെ പ്രാധാന്യത്തെക്കുറിച്ച് സംസാരിച്ചത്. 

ഞാൻ സഊദി പ്രൊ ലീഗിലേക്ക് വരാൻ തീരുമാനിച്ചപ്പോൾ ഈ ലീഗ് ഇത്ര വേഗത്തിൽ വളരുമെന്ന് ഞാൻ കരുതിയിരുന്നില്ല. എന്നാൽ ഒന്നോ രണ്ടോ വർഷത്തിനുള്ളിൽ സഊദി ലീഗ് ഇപ്പോഴുള്ളതിനേക്കാൾ വളരെ മികച്ചതായിരിക്കുമെന്ന് എനിക്കറിയാമായിരുന്നു. ആളുകൾ സഊദി അറേബ്യയെക്കുറിച്ച് സംസാരിക്കുന്നതും അമേരിക്കയെക്കുറിച്ച് സംസാരിക്കുന്നതും വ്യത്യസ്തമായ രീതിയിലാണ്. എം‌എൽ‌എസ് ഒരു മോശം ലീഗാണോ എന്ന് ചോദിച്ചാൽ തീർച്ചയായും, പക്ഷേ സഊദി അറേബ്യയായതിനാൽ ആളുകൾ അവജ്ഞയോടെയാണ് കാണുന്നത്. ആളുകൾക്ക് അവർ എന്താണ് സംസാരിക്കുന്നതെന്ന് അറിയില്ല. സഊദിയിലുള്ള ആളുകൾ ഇവിടത്തെ ലീഗിന് മൂല്യം നൽകണം,' റൊണാൾഡോ പറഞ്ഞു.

2023ൽ മാഞ്ചസ്റ്റർ യുണൈറ്റഡിൽ നിന്നുമാണ് റൊണാൾഡോ അൽ നസറിൽ എത്തുന്നത്. റൊണാൾഡോയുടെ വരവിന് പിന്നാലെ സഊദി ഫുട്ബോളിന് ലോക ഫുട്ബോളിൽ കൃത്യമായ ഒരു മേൽവിലാസം സൃഷ്ടിച്ചെടുക്കാൻ സാധിച്ചിരുന്നു. റൊണാൾഡോക്ക് പുറമേ യൂറോപ്പ്യൻ ക്ലബ്ബുകളിലെ വമ്പൻ താരനിര സഊയിലേക്ക് കൂടു മാറിയിരുന്നു. കരിം ബെൻസിമ, നെയ്മർ, സാദിയോ മാനെ, റിയാദ് മെഹറസ്, റോബർട്ടോ ഫിർമീഞ്ഞോ തുടങ്ങിയ പ്രധാന താരങ്ങളും സഊദിയിലേക്ക് മാറിയിരുന്നു.

സഊദി വമ്പൻമാർക്ക് വേണ്ടി ഇതുവരെ തകർപ്പൻ പ്രകടനങ്ങളാണ് റൊണാൾഡോ നടത്തിക്കൊണ്ടിരിക്കുന്നത്. അൽ നസറിനായി 2023-24 സീസണിൽ 45 മത്സരങ്ങളിൽ നിന്നും 44 ഗോളുകളും 13 അസിസ്റ്റുകളുമായിരുന്നു റൊണാൾഡോ നേടിയിരുന്നത്. ഇതിൽ സഊദി ലീഗിൽ 35 ഗോളുകളുമാണ് റൊണാൾഡോ അടിച്ചുകൂട്ടിയത്. സഊദി പ്രോ ലീഗിലെ കഴിഞ്ഞ സീസണിലെ ടോപ് സ്കോററും റൊണാൾഡോ തന്നെയാണ്.