കൊച്ചി:എംഎൽഎ ഉമ തോമസ് ഇന്നലെ കലൂർ സ്റ്റേഡിയത്തില്‍ നൃത്തപരിപാടിക്കിടെ ഗ്യാലറിയിയിൽ നിന്നും വീണ് പരുക്കേറ്റ സംഭവത്തിൽ പൊലിസ് കേസെടുത്തു. പരിപാടി നടത്തിയ സംഘാടകർക്കെതിരെയാണ് കേസ് എടുത്തിട്ടുള്ളത്. പരിപാടിക്കുള്ള സ്റ്റേജ് നിർമിച്ചവർക്കെതിരെയും കേസ് ഉണ്ടാവും. അപകടത്തിൽ സുരക്ഷാ വീഴ്ച നടന്നുവെന്നാണ് എഫ്ഐആർ. സ്റ്റേജിൽ കൃത്യമായ കൈവരികൾ സ്ഥാപിച്ചിട്ടില്ലെന്നും എഫ്ഐആർ റിപ്പോർട്ടിൽ പറയുന്നുണ്ട്. 

10 അടിയോളം ഉയരം വരുന്ന വിഐപി പവലിയനിൽ നിന്നാണ് ഉമ തോമസ് വീണത്. സ്റ്റേഡിയത്തിൽ കാര്യമായ സുരക്ഷാ ക്രമീകരണങ്ങൾ ഒരുക്കിയിരുന്നില്ല. റിബൺ കെട്ടിയായിരുന്നു സ്റ്റേജിൽ ബാരിക്കേഡ് സ്ഥാപിച്ചിരുന്നത്. ഗ്യാലറിയിലെ കസേരകൾ മാറ്റിസ്ഥാപിച്ചായിരുന്നു താത്ക്കാലികമായി സ്റ്റേജ് നിർമ്മിച്ചിരുന്നത്. 

ഉമ തോമസിനെ ഐസുവിലേക്ക് മാറ്റിയിട്ടുണ്ട്. നിലവിൽ ഉമ തോമസ് പാലാരിവട്ടത്തെ സ്വകാര്യ ആശുപത്രയിൽ ചികിത്സയിലാണ് ഉള്ളത്. തലക്കും ശ്വാസകോശത്തിലുമായി ഗുരുതരമായി പരിക്കേറ്റ ഉമ തോമസ് 24 മണിക്കൂർ നിരീക്ഷണത്തിൽ കഴിയുകയാണ്. അഞ്ചു വിദഗ്ദ്ധ ഡോക്ടർമാരാണ് ചികിത്സക്ക് നേതൃത്വം നൽകുന്നത്.