പാലക്കാട്: ആത്മകഥാ വിവാദം കത്തിനില്‍ക്കെ ഇ.പി ജയരാജന്‍ തെരഞ്ഞെടുപ്പ് പ്രചാരണത്തിനായി ഇന്ന് പാലക്കാട് എത്തും. സ്വതന്ത്ര സ്ഥാനാര്‍ഥിയായ പി. സരിനിനു വേണ്ടി പ്രചാരണം നടത്തും. ആത്മകഥയിലെ സരിന് എതിരായ പരാമര്‍ശത്തിന് പിന്നാലെയാണ് സി.പി.എം നീക്കം. 

വൈകിട്ട് അഞ്ചുമണിക്ക് മുനിസിപ്പല്‍ ബസ് സ്റ്റാന്‍ഡില്‍ പൊതുയോഗത്തില്‍ ഇ.പി സംസാരിക്കും. സി.പി.എം നിര്‍ദേശപ്രകാരമാണ് ഇ.പി എത്തുന്നത്. ആത്മകഥ തന്റേതല്ലെന്നും ഇതിനെതിരേ നിയമനടപടി സ്വീകരിക്കുമെന്നും ഇ.പി ജയരാജന്‍ പ്രതികരിച്ചിരുന്നു. ഇതിന് പിന്നാലെയാണ് സി.പി.എമ്മിന്റെ നിര്‍ണായക നീക്കം.

ബുധനാഴ്ച പുറത്തുവന്ന ആത്മകഥയെച്ചൊല്ലിയുള്ള വിവാദങ്ങളുടെ മുനയൊടിക്കാനുള്ള ഒരു വിശദീകരണ പൊതുയോഗം തന്നെയായിരിക്കും ഇതെന്നാണ് കരുതുന്നത്.