ദോഹ: അഞ്ചാമത് ഖത്തര്‍ ബലൂണ്‍ ഫെസ്റ്റിവല്‍ കതാറ കള്‍ച്ചറല്‍ വില്ലേജില്‍ നടക്കും. ഡിസംബര്‍ 12ന് ആരംഭിക്കുന്ന മേളയില്‍ അമ്പതിലേറെ കൂറ്റന്‍ ബലൂണുകളാണ് വിസ്മയം തീര്‍ക്കാനെത്തുക. ബലൂണ്‍ ഫെസ്റ്റിവലിന്റെ മുന്‍ പതിപ്പുകളെപ്പോലെ ഈ വര്‍ഷവും സന്ദര്‍ശകര്‍ക്കായി വിവിധ വിനോദ പരിപാടികളാണ് ഒരുക്കുന്നത്. ഹോട്ട് എയര്‍ ബലൂണുകളുടെ നിര്‍മാണം പരിചയപ്പെടുന്നതിനും ഇത്തവണ അവസരമൊരുക്കും.

ഫെസ്റ്റിവലില്‍ വ്യത്യസ്ത ആകൃതിയിലും നിറങ്ങളിലുമായി 50ലധികം ഹോട്ട് എയര്‍ ബലൂണുകളുടെ പ്രദര്‍ശനം, പ്രത്യേക ഫാമിലി ഏരിയ, കുട്ടികള്‍ക്കുള്ള ഗെയിമുകള്‍, രുചിവൈവിധ്യങ്ങളുടെ ഫുഡ്‌കോര്‍ട്ട് എന്നിങ്ങനെയുള്ള നിരവധി ആകര്‍ഷണങ്ങള്‍ ഉണ്ടാകും.

ഹോട്ട് എയര്‍ ബലൂണില്‍ സഞ്ചരിച്ച് ഖത്തറിന്റെ ഭംഗി ആസ്വദിക്കാനും സന്ദര്‍ശകര്‍ക്ക് അവസരമുണ്ട്. രാവിലെയാണ് ബലൂണില്‍ പറന്ന് ഖത്തര്‍ കാണാനുള്ള അവസരമൊരുക്കിയിരിക്കുന്നത്. ആകാശയാത്രയുടെ അനുഭവം കൂടുതല്‍ പേരിലെത്തിക്കാന്‍ സബ്‌സിഡി നിരക്കില്‍ 499 ഖത്തര്‍ റിയാലിന് 1000 ടിക്കറ്റുകള്‍ വിതരണം ചെയ്യുമെന്ന് സംഘാടകര്‍ അറിയിച്ചു.

ടിക്കറ്റുകള്‍ ഇപ്പോള്‍ ഓണ്‍ലൈനില്‍ ലഭ്യമാണ്. കതാറയില്‍ വൈകിട്ട് മൂന്ന് മുതല്‍ രാത്രി പത്ത് വരെ കാര്‍ണിവല്‍ ഗെയിംസ്, ലേസര്‍ ഷോ, തുടങ്ങി വിവധ പരിപാടികള്‍ നടക്കും. ഡിസംബര്‍ 12ന് ആരംഭിക്കുന്ന മേള ഡിസംബര്‍ 21 ന് സമാപിക്കും.

കൂടൂതൽ ​ഗൾഫ് വാർത്തകളറിയാൻ ഈ ഗ്രൂപ്പിൽ ജോയിൻ ചെയ്യുക

Get ready for a spectacular aerial display! The 5th Qatar Balloon Festival will soar into action from December 12 to 21, offering a mesmerizing experience with colorful hot air balloons, entertainment, and family-friendly activities.