കുവൈത്ത് സിറ്റി: കുവൈത്തിലെ ബാങ്കുകളില്‍ അക്കൗണ്ട് തുടങ്ങാനുള്ള മിനിമം വേതന മാനദണ്ഡങ്ങള്‍
ഒഴിവാക്കിയതായി കുവൈത്ത് സെന്‍ട്രല്‍ ബാങ്ക് വ്യക്തമാക്കി. ഇതോടെ ചെറിയ ശമ്പളമുള്ള പ്രവാസികള്‍ക്കും ഇനിമുതല്‍ രാജ്യത്ത് ബാങ്ക് അക്കൗണ്ടുകള്‍ ആരംഭിക്കാന്‍ കഴിയും. ഇതു സംബന്ധിച്ച നിര്‍ദേശങ്ങള്‍ രാജ്യത്തെ എല്ലാ ബാങ്കുകള്‍ക്കും നല്‍കിയതായി സെന്‍ട്രല്‍ ബാങ്ക് വിശദീകരിച്ചു.

മുന്‍പ് രാജ്യത്ത് ബാങ്ക് അക്കൗണ്ടുകള്‍ തുടങ്ങണമെങ്കില്‍ നിശ്ചിത ശമ്പളം ആവശ്യമായിരുന്നു. ഇതോടെ, ഗാര്‍ഹിക തൊഴിലാളികള്‍ ഉള്‍പ്പടെയുള്ള കുറഞ്ഞ വരുമാനമുള്ളവര്‍ പണമിടപാടുകള്‍ നടത്തുന്നതിനായി അനൗപചാരിക സംവിധാനങ്ങള്‍ ആയിരുന്നു കൂടുതലും ഉപയോഗിച്ചിരുന്നത്. ഇത് ഒഴിവാക്കാനാണ് ബാങ്ക് അക്കൗണ്ട് തുറക്കാന്‍ മിനിമം വേതനം ആവശ്യമാണെന്ന മാനദണ്ഡം മരവിപ്പിച്ചുകൊണ്ട് കുവൈത്ത് സെന്‍ട്രല്‍ ബാങ്ക് ഉത്തരവ് പുറത്തിറക്കിയത്.

പുതിയ മാനദണ്ഡങ്ങള്‍ പ്രകാരം കുറഞ്ഞ വരുമാനമുള്ള എല്ലാ താമസക്കാര്‍ക്കും ഇനി ശമ്പള നിയന്ത്രണങ്ങള്‍ കൂടാതെ രാജ്യത്തെ ബാങ്കിങ് സംവിധാനം ഉപയോഗപ്പെടുത്താന്‍ കഴിയും. ഇതോടെ എല്ലാവര്‍ക്കും സേവിങ്‌സ് അക്കൗണ്ട്, ലോണുകള്‍, സ്വദേശത്തേക്ക് പണമയക്കല്‍ തുടങ്ങിയ സേവനങ്ങള്‍ക്ക് അര്‍ഹതയുണ്ടാകും. കുവൈത്തിലെ മറ്റു താമസക്കാര്‍ക്ക് ലഭിക്കുന്ന അതേ ബാങ്കിങ് ആനുകൂല്യങ്ങള്‍ പ്രവാസികള്‍ക്കും വീട്ടുജോലിക്കാര്‍ക്കും ലഭ്യമാകുന്നുണ്ടെന്ന് ഉറപ്പു വരുത്തുന്നതിന് കൂടിയാണ് ഇത്തരമൊരു നടപടി സ്വീകരിച്ചതെന്ന് കുവൈത്ത് സെന്‍ട്രല്‍ ബാങ്ക് വ്യക്തമാക്കി.

Good news for expatriates in Kuwait; Minimum wage restrictions for opening bank accounts have been waived