റിയാദ്: അൽ നസറിനു വേണ്ടി വീണ്ടും ഗോളടിയിൽ തിളങ്ങി സൂപ്പർ താരം ക്രിസ്റ്റ്യാനോ റൊണാൾഡോ. എഎഫ്സി ചാമ്പ്യൻസ് ലീഗിൽ അൽ വാസലിനെതിരെ ഇരട്ട ഗോൾ നേടിയാണ് റൊണാൾഡോ മികച്ച പ്രകടനം നടത്തിയത്. മത്സരത്തിൽ അൽ നസർ എതിരില്ലാത്ത നാലു ഗോളുകളുടെ വിജയമായിരുന്നു സ്വന്തമാക്കിയത്.

മത്സരത്തിന്റെ ആദ്യ പകുതിയിൽ അവസാനിക്കുന്നതിന് തൊട്ടുമുമ്പ് ലഭിച്ച പെനാൽറ്റി കൃത്യമായി വലയിൽ എത്തിച്ചുകൊണ്ടാണ് റൊണാൾഡോ ആദ്യ ഗോൾ നേടിയത്. രണ്ടാം പകുതിയിൽ 78ാം മിനിറ്റിൽ റൊണാൾഡോ രണ്ടാം ഗോളും നേടി. ഇതോടെ തന്റെ ഫുട്ബോൾ കരിയറിൽ 202 വ്യത്യസ്ത ടീമുകൾക്കെതിരെ ഗോൾ നേടുന്ന താരമായി മാറാനും റൊണാൾഡോക്ക് സാധിച്ചു.

മത്സരത്തിൽ അൽ നസറിനു വേണ്ടി റൊണാൾഡോയ്ക്ക് പുറമെ അലി അൽ ഹസൻ (25), മുഹമ്മദ്‌ അൽ ഫാത്തിൽ(88) എന്നിവരാണ് മറ്റു ഗോളുകൾ നേടിയത്. ഗോൾ തിരിച്ചടിക്കാൻ എതിരാളികൾ എട്ട് ഷോട്ടുകൾ അൽ നസറിന്റെ പോസ്റ്റിലേക്ക് ഉതിർത്തെങ്കിലും ടീമിന്റെ പ്രതിരോധം മികച്ചു നിൽക്കുകയായിരുന്നു.

നിലവിൽ ടൂർണമെന്റിൽ ഗ്രൂപ്പ് ഡിയിൽ രണ്ടാം സ്ഥാനത്താണ് റൊണാൾഡോയും സംഘവും ഉള്ളത്. ഏഴു മത്സരങ്ങളിൽ നിന്നും അഞ്ചു വിജയവും ഓരോ വീതം സമനിലയും തോൽവിയുമായി 16 പോയിന്റ് ആണ് ഉള്ളത്. സൗഊദി പ്രൊ ലീഗിൽ ഫെബ്രുവരി ഏഴിനാണ് അൽ നസറിന്റെ അടുത്ത മത്സരം നടക്കുന്നത്. അൽ അവാൽ പാർക്കിൽ നടക്കുന്ന മത്സരത്തിൽ ആണ് റൊണാൾഡോയുടെയും കൂട്ടരുടെയും എതിരാളികൾ.