ദോഹ: ഉപയോക്തൃ സൗഹൃദം കൂടുതല്‍ മെച്ചപ്പെടുത്തി കൂടുതല്‍ സേവനങ്ങള്‍ ഉള്‍പ്പെടുത്തി ഖത്തര്‍ ആഭ്യന്തര മന്ത്രാലയം പരിഷ്‌കരിച്ച മെട്രാഷ് ആപ്പ് പുറത്തിറക്കി. അതി നൂതന സാങ്കേതികവിദ്യകള്‍ക്കനുസൃതമായി ആഭ്യന്തര മന്ത്രാലയം പുതിയ മെട്രാഷ് ആപ്പ് വികസിപ്പിച്ചതായി ആഭ്യന്തര മന്ത്രാലയത്തിലെ കമ്മ്യൂണിക്കേഷന്‍സ് ആന്‍ഡ് ഇന്‍ഫര്‍മേഷന്‍ സിസ്റ്റംസ് ഡയറക്ടര്‍ ജനറല്‍ ബ്രിഗേഡിയര്‍ ജാസിം അല്‍ ബുഹാഷിം അല്‍സെയ്ദ് പറഞ്ഞു.

ഉപയോക്താക്കളുടെ വിവരങ്ങളിലേക്കും സേവനങ്ങളിലേക്കുമുള്ള ആക്‌സസ് കൂടുതല്‍ കാര്യക്ഷമമാക്കുന്നതിനുള്ള സൗകര്യമാണ് പരിഷ്‌ക്കരിച്ച ആപ്പിന്റെ ഏറ്റവും വലിയ സവിശേഷതയെന്ന് അല്‍സെയ്ദ് ഒരു സ്വകാര്യ ന്യൂസ് ഏജന്‍സിയോട് പറഞ്ഞു. ഡോക്യുമെന്റ്‌റ് ഡെലിവറി ആവശ്യങ്ങള്‍ക്കായുള്ള അഡ്രസ് മാനേജ്‌മെന്റ്, വിവിധ സേവന കേന്ദ്രങ്ങളുടെ ലൊക്കേഷനുകള്‍, വിസ ഇഷ്യുവിനായി പാസ്‌പോര്‍ട്ട് സ്‌കാനിങ് എന്നീ സൗകര്യങ്ങള്‍ പുതിയ സവിശേഷതകളില്‍ ഉള്‍പ്പെടുന്നു.

സര്‍ട്ടിഫിക്കറ്റുകള്‍ ഇഷ്യു ചെയ്യാനും റീപ്രിന്റ് ചെയ്യാനും ഷെയര്‍ ചെയ്യാനും എല്ലാ സുരക്ഷാ സേവനങ്ങളും എളുപ്പത്തില്‍ ആക്‌സസ് ചെയ്യാനും ആപ്പില്‍ പുതിയ ഐക്കണുകള്‍ കൂട്ടിച്ചേര്‍ത്തതായും അല്‍സെയ്ദ് പറഞ്ഞു. ജിസിസി പൗരന്മാര്‍ക്ക് ഖത്തര്‍ ഐഡി പുതുക്കുന്നതിനും നഷ്ട്ടപ്പെട്ടതോ കേടായതോ ആയ ഐഡി മാറ്റുന്നതിനും പരിഷ്‌കരിച്ച മെട്രാഷ് ആപ്പില്‍ സൗകര്യമുണ്ട്.

ഗൂഗിള്‍ പ്ലേ സ്‌റ്റോര്‍, ആപ്പിള്‍ സ്റ്റോര്‍ എന്നിവ ഉപയോഗിച്ച് ആപ്പിന്റെ പുതുക്കിയ പതിപ്പ് ഡൗണ്‍ലോഡ് ചെയ്യാമെന്ന് മന്ത്രാലയം അറിയിച്ചു.