അബൂദബി: യുഎഇയുടെ ദേശീയ വിമാനക്കമ്പനിയായ എത്തിഹാദ് എയർവേയ്‌സ് ഏറെ പ്രതീക്ഷയോടെ കാത്തിരുന്ന വാർഷിക പ്രീമിയം സെയിൽ പ്രഖ്യാപിച്ചു. ഇതിലൂടെ യാത്രക്കാർക്ക് കുറഞ്ഞ നിരക്കിൽ വിവിധ ലക്ഷ്യസ്ഥാനങ്ങളിലേക്ക് ബിസിനസ് ക്ലാസ് ടിക്കറ്റുകൾ ബുക്ക് ചെയ്യാൻ സാധിക്കും.

യാത്രക്കാർക്ക് ഇപ്പോൾ ഇന്ത്യയിലേക്കുള്ള ബിസിനസ് ക്ലാസ് ടിക്കറ്റുകൾ 3,000 ദിർഹത്തിൽ താഴെ സ്വന്തമാക്കാം. യുകെയിലെ മാഞ്ചസ്റ്ററിലേക്കുള്ള വിമാന ടിക്കറ്റുകൾ 9,995 ദിർഹത്തിന് ലഭിക്കും. മാർച്ച് 1 നും ജൂൺ 20 നും ഇടയിൽ യാത്രാ തീയതികൾ നിശ്ചയിച്ചിരിക്കുന്ന ഈ ഓഫർ ഫെബ്രുവരി 5 വരെ ടിക്കറ്റ് ബുക്കിം​ഗ് നടത്തുന്നവർക്കാകും ലഭ്യമാകുക. 

ഓഫറിന്റെ ഭാഗമായി, അഹമ്മദാബാദ്, ബെംഗളൂരു, കൊച്ചി, കൊൽക്കത്ത, ന്യൂഡൽഹി, തിരുവനന്തപുരം എന്നിങ്ങനെയുള്ള പ്രധാന ഇന്ത്യൻ നഗരങ്ങളിലേക്കുള്ള റിട്ടേൺ ബിസിനസ് ക്ലാസ് ടിക്കറ്റുകൾക്ക് 2,495 ദിർഹമാണ് വില. അതേസമയം, ബാഴ്‌സലോണ (11,995 ദിർഹം), ഫ്രാങ്ക്ഫർട്ട് (10,985 ദിർഹം), ഡബ്ലിൻ (9,995 ദിർഹം), ലിസ്ബൺ, മാഡ്രിഡ് (11,995 ദിർഹം) തുടങ്ങിയ യൂറോപ്യൻ ന​ഗരങ്ങളിലേക്കും കുറഞ്ഞ നിരക്കിൽ ടിക്കറ്റുകൾ ലഭിക്കും.

യാത്രക്കാർക്ക് മസ്‌കത്തിലേക്കുള്ള ടിക്കറ്റുകൾ 995 ദിർഹത്തിന് ലഭിക്കും. തെക്കുകിഴക്കൻ ഏഷ്യയിലേക്ക് യാത്രചെയ്യുന്നവർക്ക് ഫുക്കറ്റിലേക്കുള്ള വിമാന ടിക്കറ്റുകൾ 7,995 ദിർഹത്തിനും ക്വാലാലംപൂരിലേക്കുള്ള ടിക്കറ്റുകൾ 9,995 ദിർഹത്തിനും ലഭിക്കും. എല്ലാ നിരക്കുകളിലും നികുതികളും സർചാർജുകളും ഉൾപ്പെടുന്നു.

2025 ൽ 13 പുതിയ ലക്ഷ്യസ്ഥാനങ്ങളിലേക്കു കൂടി എത്തിഹാദ് എയർവേയ്‌സ് തങ്ങളുടെ ബിസിനസ് ശൃംഖല വികസിപ്പിക്കാൻ ഒരുങ്ങുകയാണ്. ജൂലൈ മുതൽ യുഎസ്എയിലെ അറ്റ്ലാന്റയിലേക്ക് ആഴ്ചയിൽ നാല്  വിമാന സർവിസുകളും തുടർന്ന് സെപ്റ്റംബറിൽ തായ്‌പേയിലേക്ക് ദിവസേനയുള്ള വിമാന സർവിസുകളും ആരംഭിക്കും. ഒക്ടോബർ 2 മുതൽ എത്തിഹാദ് ഇന്തോനേഷ്യയിലെ മേദാനിലേക്ക് ആഴ്ചയിൽ മൂന്ന് സർവിസുകളും കംബോഡിയയിലെ ഫ്‌നോം പെനിലേക്ക് ആഴ്ചയിൽ അഞ്ച് സർവിസുകളും ആരംഭിക്കും.

സർവിസുകളുടെ വിപുലീകരണവും പ്രീമിയം വിൽപ്പനയും യാത്രക്കാർക്ക് കൂടുതൽ കണക്റ്റിവിറ്റിയും ആഡംബര യാത്രാനുഭവങ്ങളും നൽകുന്നതിനുള്ള എത്തിഹാദിന്റെ പ്രതിബദ്ധതയെ പ്രതിഫലിപ്പിക്കുന്നതാണ്.

Etihad Airways has kicked off its annual premium sale, offering exclusive discounts and promotions on business class flights, providing travelers with a luxurious and affordable flying experience.