ദുബൈ: അവശ്യവസ്‌തുക്കളുടെ വിലവർധനക്ക് നിയന്ത്രണം ഏർപ്പെടുത്തി യു.എ.ഇ സാമ്പത്തിക മന്ത്രാലയം. അരി, മുട്ട, പാചകയെണ്ണ തുടങ്ങി ഒമ്പത് ഉൽപന്നങ്ങൾക്ക് വിലകൂട്ടാൻ ചില്ലറ വിൽപനക്കാർ ഇനി മുതൽ മന്ത്രാലയത്തിൻ്റെ അനുമതി വാങ്ങണം. 

ജനുവരി രണ്ട് മുതൽ യു.എ.ഇയിൽ വിലവർധനക്ക് നിയന്ത്രണം നിലവിൽ വരും. ആറുമാസത്തെ ഇടവേളക്കിടയിൽ അവശ്യസാധനങ്ങളുടെ വിലവർധിപ്പിക്കാൻ പാടില്ല. മാത്രമല്ല അരി, മുട്ട, പാചകയെണ്ണ, പാലുൽപ്പന്നങ്ങൾ, പഞ്ചസാര, കോഴി, പയർവർഗങ്ങൾ, ഗോതമ്പ്, റൊട്ടി തുടങ്ങി അടിസ്ഥാന വസ്‌തുക്കളുടെയൊന്നും വില അനുമതിയില്ലാതെ വർധിപ്പിക്കാൻ സാധിക്കില്ല. അവശ്യ വസ്‌തുക്കളുടെ വിതരണക്കാർ, ചില്ലറ വ്യാപാരികൾ, ഡിജിറ്റൽ വ്യാപാരികൾ തുടങ്ങിയവർക്കെല്ലാം പുതിയ ഉത്തരവ് ബാധകമാണ്.

നിയമം പാലിക്കപ്പെടുന്നുണ്ടെന്ന് ഉറപ്പാക്കാൻ അധികൃതർ പ്രത്യേക സംഘത്തെ നിയോഗിച്ചിട്ടുണ്ട്. സുതാര്യത ഉറപ്പാക്കുന്നതിനായി റീട്ടെയിൽ സ്റ്റോറുകളിൽ വില പ്രദർശിപ്പിക്കണം. കൂടാതെ ശുചീകരണ ഉല്പ്പന്നങ്ങൾ ഉൾപ്പെടെ ഏതൊരു ഉല്പ്പന്നത്തിൻ്റെയും വില വർധിപ്പിക്കണമെങ്കിലും സാമ്പത്തിക മന്ത്രാലയത്തിൻ്റെ മുൻകൂർ അനുമതി നിർബന്ധമാണെന്ന് മന്ത്രാലയം അണ്ടർസെക്രട്ടറി അബ്‌ദുല്ല അഹമ്മദ് അൽ സാലിഹ് വ്യക്തമാക്കി. പുതിയ നയം യു.എ.ഇയിലെ എല്ലാ എമിറേറ്റുകളിലും ബാധകമായിരിക്കും.

The UAE has implemented price control policies to regulate the prices of essential goods and services, thereby preventing cost-induced inflation.