റിയാദ്: സഊദി പ്രൊ ലീഗിൽ അൽ നസർ വിജയകുതിപ്പ് തുടരുന്നു. കഴിഞ്ഞദിവസം നടന്ന മത്സരത്തിൽ അൽ റെയ്ദിനെ ഒന്നിനെതിരെ രണ്ട് ഗോളുകൾക്കാണ് അൽ നസർ പരാജയപ്പെടുത്തിയത്. ഈ തകർപ്പൻ വിജയത്തോടെ മറ്റൊരു ഫുട്‍ബോൾ താരത്തിനും സ്വന്തമാക്കാൻ സാധിക്കാത്ത നേട്ടമാണ് ക്രിസ്റ്റ്യാനോ റൊണാൾഡോ കൈപ്പിടിയിലാക്കിയത്. 

ഫുട്ബോളിൽ ക്ലബ് തലത്തിൽ 700 വിജയങ്ങൾ നേടുന്ന ആദ്യ താരമായാണ് റൊണാൾഡോ മാറിയത്. അൽ നസറിന് പുറമെ സ്പോർട്ടിങ് ലിസ്ബൺ, മാഞ്ചസ്റ്റർ യുണൈറ്റഡ്, യുവന്റസ്, റയൽ മാഡ്രിഡ് എന്നീ ടീമുകൾക്കൊപ്പവും റൊണാൾഡോ ഒരുപാട് വിജയങ്ങൾ സ്വന്തമാക്കിയിട്ടുണ്ട്. 

മത്സരത്തിൽ റൊണാൾഡോ ഒരു ഗോളും അസിസ്റ്റും നേടി മികച്ച പ്രകടനമാണ് നടത്തിയത്. മത്സരത്തിൽ 35ാം മിനിറ്റിൽ ആയിരുന്നു റൊണാൾഡോ ലക്ഷ്യം കണ്ടത്. പിന്നീട് 47ാം മിനിറ്റിൽ നവാഫ് ബൗഷലിലൂടെ അൽ നസർ രണ്ടാം ഗോളും നേടി. അൽ റെയ്ദിന് വേണ്ടി അബ്ദുൽ സയൂദാണ് ഗോൾ നേടിയത്. 

വിജയത്തോടെ സഊദി പ്രൊ ലീഗിൽ മൂന്നാം സ്ഥാനത്താണ് അൽ നസർ. 18 മത്സരങ്ങൾ പിന്നിട്ടപ്പോൾ 11 ജയവും അഞ്ചു സമനിലയും രണ്ട് തോൽവിയുമായി 38 പോയിന്റാണ് അൽ നസറിന്റെ കൈവശമുള്ളത്. ഫെബ്രുവരി മൂന്നിന് നടക്കുന്ന എഎഫ്സി ചാമ്പ്യൻസ് ലീഗിൽ അൽ വാസലിനെതിരെയാണ് റൊണാൾഡോയുടെയും സംഘത്തിന്റെയും അടുത്ത മത്സരം.