കോഴിക്കോട: അരയിടത്ത് പാലത്ത് ഇന്നലെയുണ്ടായ ബസ് അപകടത്തില്‍ പരിക്കേറ്റ് ചികിത്സയിലായിരുന്ന ബൈക്ക് യാത്രികന്‍ മരിച്ചു. കൊമ്മേരി സ്വദേശി മുഹമ്മദ് സാനിഹ് ആണ് മരിച്ചത്. ഇയാള്‍ സഞ്ചരിച്ച ബൈക്കിലിടിച്ചാണ് ബസ് മറിഞ്ഞത്. കോഴിക്കോട് ബേബി മെമ്മോറിയല്‍ ആശുപത്രിയില്‍ ചികിത്സയിലിരിക്കെയാണ് മരണം.

പുതിയ സ്റ്റാന്റിന് സമീപം 4.15 ഓടെയാണ് അപകടമുണ്ടായത്. സാനിഹ് സഞ്ചരിച്ച ബൈക്കില്‍ ഇടിച്ച ബസ് നിയന്ത്രണം വിട്ട് മീഡിയനില്‍ ഇടിച്ച് മറിയുകയായിരുന്നു. കോഴിക്കോട്- മാവൂര്‍-കൂളിമാട് റൂട്ടില്‍ സര്‍വീസ് നടത്തിയിരുന്ന ബസാണ് അപകടത്തില്‍പ്പെട്ടത്. സ്‌കൂള്‍ കുട്ടികളടക്കം 50 ലധികം പേരാണ് അപകട സമയത്ത് ബസിലുണ്ടായിരുന്നത്. 50ലേറെ പേര്‍ക്കും അപകടത്തില്‍ പരിക്കേറ്റിട്ടുണ്ട്. ആകെ 54 പേരാണ് ചികിത്സ തേടിയത്. പരുക്കേറ്റ 42 പേരെ ബേബി മെമ്മോറിയല്‍ ആശുപത്രിയില്‍ പ്രവേശിപ്പിച്ചു. 12 പേര്‍ കോഴിക്കോട് മെഡിക്കല്‍ കോളേജ് ആശുപത്രിയിലും ചികിത്സയിലുണ്ട്.