കേന്ദ്ര ബജറ്റിന് മുന്‍പ് വാണിജ്യ എല്‍.പി.ജി സിലിണ്ടറിന്റെ വില കുറച്ച് പൊതുമേഖലാ എണ്ണക്കമ്പനികള്‍. കേരളത്തില്‍ ആറ് രൂപയാണ്(19 കിലോഗ്രാം) കുറഞ്ഞത്. ഇതോടെ കൊച്ചിയില്‍ വില 1806 രൂപയായി. കോഴിക്കോട് 1838 രൂപയും, തിരുവനന്തപുരത്ത് 1827 രൂപയുമായി. ഹോട്ടലുകള്‍ക്കും തട്ടുകടകള്‍ക്കും വിലഇടിവ് ചെറിയൊരു ആശ്വാസമാണ്. 

അതേസമയം, ഗാര്‍ഹിക പാചക വാതക വിലയില്‍ നിലവില്‍ മാറ്റമില്ല.

ഓഗസ്റ്റ് മുതല്‍ ഡിസംബര്‍ വരെ തുടര്‍ച്ചയായി വില വര്‍ധിപ്പിച്ച ശേഷമാണ് തുടര്‍ച്ചയായി രണ്ട് മാസങ്ങൡ വാണിജ്യ എല്‍.പി.ജി സിലിണ്ടറുകളുടെ നിരക്ക് കുറയ്ക്കുന്നത്. ഡിസംബറില്‍ മാത്രം 62 രൂപ കൂട്ടിയിരുന്നു. ഇന്നത്തെ കണക്കനുസരിച്ച്, ഡല്‍ഹിയില്‍ 19 കിലോഗ്രാം വാണിജ്യ എല്‍.പി.ജി സിലിണ്ടറിന്റെ വില 1,804 രൂപയില്‍ നിന്ന് 1,797 രൂപയായി കുറഞ്ഞു.

സാധാരണക്കാരുടെ പ്രധാന ആവശ്യങ്ങളിലൊന്നാണ് പാചക വാതക വില കുറയുന്നത്. അതിനാല്‍ നിലവിലെ സാഹചര്യം അനുസരിച്ച് ബജറ്റില്‍ ഗാര്‍ഹിക ഗ്യാസ് സിലിണ്ടറുകളുടെ വില പരിഗണിക്കുമെന്നാണ് പ്രതീക്ഷിക്കുന്നത്.