തിരുവനന്തപുരം: സംസ്ഥാനത്ത് മദ്യവില കൂട്ടി. വില വര്‍ധന തിങ്കളാഴ്ച്ച മുതല്‍ പ്രാബല്യത്തില്‍ വരും. ഇന്ത്യന്‍ നിര്‍മ്മിത വിദേശമദ്യത്തിനും ബിയറിനും വൈനിനുമാണ് വില കൂട്ടിയത്. ശരാശരി 10 ശതമാനം വിലവര്‍ധന ഒരു കുപ്പിയിലുണ്ടാകും. 

ബെവ്കോ നിര്‍മ്മിക്കുന്ന ജവാന്‍ റമ്മിനും 10 രൂപ കൂട്ടി. ലിറ്ററിന് 640 രൂപയായിരുന്ന ജവാന്‍ മദ്യത്തിന് ഇതോടെ വില 650 രൂപയായി.

പുതുക്കിയ മദ്യ വില വിവര പട്ടിക ബെവ്കോ പുറത്തിറക്കിയിട്ടുണ്ട്. ഇത് പ്രകാരം 62 കമ്പനികളുടെ 341 ബ്രാന്റുകള്‍ക്ക് വില വര്‍ധിക്കും.

15 മാസത്തിന് ശേഷമാണ് മദ്യത്തിന് വില കൂടുന്നത്. ബെവ്‌കോയും മദ്യക്കമ്പനികളും തമ്മിലുള്ള 'റേറ്റ് കോണ്‍ട്രാക്ട്' അനുസരിച്ചാണ് മദ്യവില നിശ്ചയിക്കുന്നത്. കമ്പനികള്‍ ഓരോ വര്‍ഷവും വിലവര്‍ധന ആവശ്യപ്പെടാറുണ്ട്.