കല്‍പറ്റ: എന്‍.എം.വിജയന്റെ ആത്മഹത്യയുമായി ബന്ധപ്പെട്ട കേസില്‍ അന്വേഷണ ഉദ്യോഗസ്ഥര്‍ക്കു മുന്നില്‍ ഹാജരായി ഐ.സി.ബാലകൃഷ്ണന്‍ എം.എല്‍.എ. പുത്തൂര്‍വയല്‍ എ.ആര്‍ ക്യാംപിലാണു ചോദ്യംചെയ്യലിന് എത്തിയത്. ഇന്നുമുതല്‍ മൂന്നുദിവസം തുടര്‍ച്ചയായി എം.എല്‍.എയെ ചോദ്യം ചെയ്യാമെന്നാണ് കോടതി നിര്‍ദ്ദേശം. 

ഏതന്വേഷണവും നേരിടാന്‍ തയാറാണെന്ന് ഐ.സി.ബാലകൃഷ്ണന്‍ മാധ്യമങ്ങളോടു പ്രതികരിച്ചു. എന്‍.എം.വിജയന്റെ ആത്മഹത്യയില്‍ അന്വേഷണം വേണമെന്നാവശ്യപ്പെട്ട് എസ്പിക്ക് ആദ്യം പരാതി നല്‍കിയത് താനാണ്. നീതിപൂര്‍വമായ അന്വേഷണമുണ്ടാകുമെന്നാണു പ്രതീക്ഷിക്കുന്നത്. കോടതി പറഞ്ഞതിന്റെ അടിസ്ഥാനത്തിലാണ് അന്വേഷണ ഉദ്യോഗസ്ഥര്‍ക്കു മുന്നില്‍ ഹാജരാകുന്നത്. ബാക്കി കാര്യങ്ങള്‍ ചോദ്യം ചെയ്യലിനുശേഷം പറയാമെന്നും അദ്ദേഹം പറഞ്ഞു.

ഡി.സി.സി പ്രസിഡന്റ് എന്‍.ഡി.അപ്പച്ചന്‍, മുന്‍ ഡി.സി.സി ട്രഷറര്‍ കെ.െക.ഗോപിനാഥന്‍ എന്നിവരെ ചോദ്യം ചെയ്യലിനുശേഷം ഇന്നലെ അറസ്റ്റ് ചെയ്തു ജാമ്യത്തില്‍ വിട്ടിരുന്നു. ഇന്നു മുതല്‍ മൂന്നു ദിവസം ചോദ്യം ചെയ്യലിനു ഹാജരാകാനാണ് ഐ.സി.ബാലകൃഷ്ണനോടു കോടതി ആവശ്യപ്പെട്ടത്. കോടതി മുന്‍കൂര്‍ ജാമ്യം അനുവദിച്ചതിനാല്‍ ഐ.സി.ബാലകൃഷ്ണനെയും ചോദ്യം ചെയ്യലിനുശേഷം അറസ്റ്റ് ചെയ്തു വിട്ടയച്ചേക്കും. കഴിഞ്ഞ ദിവസം ഡിസിസി ഓഫിസിലുള്‍പ്പെടെ പൊലീസ് പരിശോധന നടത്തിയിരുന്നു.