തിരുവനന്തപുരം: മുഖ്യമന്ത്രി പിണറായി വിജയനെ രൂക്ഷമായ ഭാഷയില്‍ വിമര്‍ശിക്കുന്ന എന്‍.സി.പി സംസ്ഥാന പ്രസിഡന്റ് പി.സി ചാക്കോയുടെ ശബ്ദസന്ദേശം പുറത്ത്. മന്ത്രിമാറ്റത്തിന് മുഖ്യമന്ത്രി തയ്യാറാകാത്തതിനെ തുടര്‍ന്നാണ് ചാക്കോയുടെ വിമര്‍ശനം. കുറിക്ക് കൊള്ളും വിധം മുഖ്യമന്ത്രിക്ക് മറുപടി നല്‍കാന്‍ തനിക്കറിയാമെന്ന് പി.സി. ചാക്കോ എന്‍.സി.പി തിരുവനന്തപുരം ജില്ലാ നേതൃയോഗത്തില്‍ പ്രസംഗിച്ചതിന്റെ ശബ്ദസന്ദേശമാണ് പുറത്തുവന്നത്. 

മാറ്റം ആവശ്യപ്പെട്ടെങ്കിലും നിര്‍ബന്ധം പിടിക്കരുതെന്ന് മുഖ്യമന്ത്രി പറഞ്ഞു. കുറിക്കുകൊള്ളുന്നതുപോലെ മുഖ്യമന്ത്രിയുടെ നെഞ്ചത്തുനോക്കി സംസാരിച്ചാല്‍ വലിയ പബ്ലിസിറ്റി കിട്ടിയേനേ. അതിനപ്പുറത്തേക്ക് പറയാമായിരുന്നെങ്കിലും താന്‍ ഒന്നും പറഞ്ഞില്ലെന്ന് ചാക്കോ പറയുന്നു. 

കഴിഞ്ഞ 27ന് തിരുവനന്തപുരത്ത് ചേര്‍ന്ന എന്‍സിപി യോഗമാണ് അലങ്കോലമായത്. ഈ യോഗത്തിലായിരുന്നു മന്ത്രിമാറ്റത്തില്‍ മുഖ്യമന്ത്രിയോടുള്ള അതൃപ്തി പിസി ചാക്കോ പരസ്യമാക്കിയത്. 

പി സി ചാക്കോയുടെ വാക്കുകള്‍

'ഞാനും ശശിയും തോമസും കൂടെ മുഖ്യമന്ത്രിയെ കണ്ടു. ഈ തീരുമാനം തെറ്റാണെങ്കില്‍ എന്തിന് മുഖ്യമന്ത്രിയെ കാണണം? സംസാരിച്ചപ്പോള്‍ ഇപ്പോള്‍ ഈ മാറ്റം വേണോ എന്നും നിര്‍ബന്ധം പിടിക്കരുതെന്നും മുഖ്യമന്ത്രി പറഞ്ഞു. ശരദ് പവാര്‍ എടുത്ത തീരുമാനമെന്ന് ഞാന്‍ പറഞ്ഞു. അതിനപ്പുറത്തേക്ക് പറഞ്ഞില്ല. ഘടക കക്ഷികളോടുള്ള കീഴ്വഴക്കങ്ങളെക്കുറിച്ച് മുഖ്യമന്ത്രിയോട് തനിക്ക് പറയാമായിരുന്നു. പത്രസമ്മേളനത്തിലും പറയാം. മുന്നണിയില്‍ ഉന്നയിക്കാം. കുറിക്ക് കൊള്ളുന്ന പോലെ മുഖ്യമന്ത്രിയുടെ നെഞ്ചത്ത് നോക്കി സംസാരിച്ചെങ്കില്‍ തനിക്ക് വലിയ പബ്ലിസിറ്റി കിട്ടും...'

നേരത്തെ മന്ത്രിമാറ്റവുമായി ബന്ധപ്പെട്ട് എന്‍.സി.പിയിലെ തര്‍ക്കത്തോട് മുഖ്യമന്ത്രിയും എല്‍.ഡി.എഫും അനുകൂലമായിട്ടല്ല പ്രതികരിച്ചത്. ശശീന്ദ്രനെ മാറ്റണമെന്ന എന്‍.സി.പി സംസ്ഥാന നേതൃത്വത്തിന്റെ ആവശ്യം മുഖ്യമന്ത്രി അംഗീകരിച്ചില്ലെന്ന് റിപ്പോര്‍ട്ടുകളുണ്ടായിരുന്നു. തോമസ് കെ തോമസിനെതിരെ ഉയര്‍ന്ന കൈക്കൂലി ആരോപണമാണ് മുഖ്യമന്ത്രിയെ ഇതില്‍ നിന്ന് പിന്തിരിപ്പിക്കുന്നതെന്നായിരുന്നു റിപ്പോര്‍ട്ട്.