ദുബൈ: ഞായറാഴ്ച ഉച്ചയോടെ പെയ്ത കനത്ത മഴയില്‍ റാസല്‍ഖൈമയിലും ഫുജൈറയിലും നാശനഷ്ടം സംഭവിച്ചതായി റിപ്പോര്‍ട്ടുകള്‍. യുഎഇയുടെ ചില കിഴക്കന്‍ പ്രദേശങ്ങളില്‍ കാലാവസ്ഥാ നിരീക്ഷണ കേന്ദ്രം യെല്ലോ, ആംബര്‍ അലര്‍ട്ടുകള്‍ പുറപ്പെടുവിച്ചു. രാജ്യത്തുടനീളം തണുത്ത താപനില പ്രതീക്ഷിക്കുന്നു. അതേസമയം, ദുബൈയിലെയും ഷാര്‍ജയിലെയും വിവിധ പ്രദേശങ്ങളില്‍ ഇന്ന് നേരിയതോതില്‍ മഴ പെയ്‌തേക്കും.

ദുബൈ ഇന്‍വെസ്റ്റ്‌മെന്റ് പാര്‍ക്കില്‍ (ഡിഐപി) ഇന്ന് ഉച്ചയ്ക്ക് 2:30 ഓടെയും അല്‍ ബത്തായി, അല്‍ റഹ്മാനിയ, ഷാര്‍ജ കോര്‍ണിഷ് എന്നിവിടങ്ങളില്‍ ഉച്ചയ്ക്ക് 1:20 ഓടെയും നേരിയ തോതില്‍ മഴ പെയ്തു. ഇന്ന് ഉച്ചയ്ക്ക് 2 മണിയോടെ റാസല്‍ഖൈമയിലെ ആസ്മയിലും 2.45 ഓടെ ഫുജൈറയിലെ അല്‍ ബിത്‌നയിലും നേരിയ തോതില്‍ മഴ പെയ്തു.

നാഷണല്‍ സെന്റര്‍ ഓഫ് മെറ്റീരിയോളജി (NCM)യുടെ മുന്നറിയിപ്പ് പ്രകാരം പകല്‍ സമയത്ത് ആകാശം മേഘാവൃതമായിരിക്കും. ഉച്ചയോടെ ചിലയിടങ്ങളില്‍ മഴ പെയ്യാന്‍ സാധ്യതയുണ്ട്. വാദികളോ താഴ്‌വരകളോ വെള്ളപ്പൊക്ക സാധ്യതയുള്ള പ്രദേശങ്ങളോ സന്ദര്‍ശിക്കുന്നത് ഒഴിവാക്കാന്‍ കാലാവസ്ഥാ നിരീക്ഷണ കേന്ദ്രം താമസക്കാരോട് നിര്‍ദേശിച്ചിട്ടുണ്ട്.

വാഹനമോടിക്കുന്നവര്‍ ശ്രദ്ധയോടെ വാഹനമോടിക്കാനും സുരക്ഷിതമായി വാഹനമോടിക്കാനും വേഗത കുറയ്ക്കാനും വെള്ളക്കെട്ടുള്ള സ്ഥലങ്ങള്‍ ഒഴിവാക്കാനും നിര്‍ദേശിച്ചിട്ടുണ്ട്. ഈ മേഖലയിലെ വാഹനമോടിക്കുന്നവര്‍ക്ക് എന്‍സിഎം മുന്‍കരുതല്‍ ജാഗ്രതാ നിര്‍ദേശവും നല്‍കി. പൊതുവേ, ഇന്ന് ആകാശം ഭാഗികമായി മേഘാവൃതമായിരിക്കും. രാജ്യത്തെ പരമാവധി താപനില 21-25 ഡിഗ്രി സെല്‍ഷ്യസും കുറഞ്ഞ താപനില 5-10 ഡിഗ്രി സെല്‍ഷ്യസും ആയിരിക്കുമെന്ന് പ്രതീക്ഷിക്കുന്നു.

ബുധനാഴ്ച രാവിലെ 10 മുതല്‍ 25 കിലോമീറ്റര്‍ വരെ വേഗതയിലും ഇടയ്ക്കിടെ മണിക്കൂറില്‍ 40 കിലോമീറ്റര്‍ വരെ വേഗതയിലും കാറ്റ് വീശുമെന്ന് പ്രതീക്ഷിക്കുന്നു. പൊടിപടലം ദൂരക്കാഴ്ച കുറയ്ക്കാന്‍ സാധ്യതയുള്ളതിനാല്‍ ഡ്രൈവര്‍മാര്‍ റോഡുകളില്‍ ജാഗ്രത പാലിക്കണം. അലര്‍ജിയുള്ളവര്‍ പുറത്ത് പോകുമ്പോള്‍ മുന്‍കരുതല്‍ എടുക്കണം. രാത്രിയിലും തിങ്കളാഴ്ച രാവിലെയും ആപേക്ഷിക ആര്‍ദ്രത വര്‍ദ്ധിക്കുമെന്ന് പ്രതീക്ഷിക്കുന്നു. ഇത് ചില ഉള്‍പ്രദേശങ്ങളിലും തീരപ്രദേശങ്ങളിലും മൂടല്‍മഞ്ഞു രൂപപ്പെടാന്‍ കാരണമാകുമെന്നും എന്‍സിഎം പറഞ്ഞു.

Heavy rains and lightning, weather alerts issued for Ras Al Khaimah, Fujairah, Sharjah, and Dubai