പാലക്കാട് : ഒറ്റപ്പാലം ത്രാങ്ങാലിയിൽ നടന്ന മോഷണത്തിൽ പുതിയ വഴിത്തിരിവ്. മാന്നനൂർ ത്രാങ്ങാലി സ്വദേശി ബാലകൃഷ്ണൻ്റെ വീട്ടിൽ നിന്നും മോഷണം പോയെന്ന് കരുതിയിരുന്ന 63 പവൻ സ്വർണം വീട്ടിൽ നിന്ന് തന്നെ കണ്ടെത്തി. വീട്ടിലെ ബെഡ് റൂമിലെ ഇരുമ്പ് അലമാരയിൽ ഭദ്രമായി സൂക്ഷിച്ച നിലയിലാണ് സ്വർണം കണ്ടെത്തിയത്. അലമാരയിലെ പ്രത്യേക അറയിലായിരുന്നു സ്വർണം സൂക്ഷിച്ചിരുന്നത്. ചെന്നൈയിലുള്ള ബാലകൃഷ്ണൻ്റെ ഭാര്യയെ വിളിച്ചു സംസാരിച്ചതിന് പിന്നാലെയാണ് സ്വർണം കണ്ടെത്തിയത്. അതേസമയം ഒരു ലക്ഷം രൂപയും വില പിടിപ്പുള്ള വാച്ചും നഷ്ടപ്പെട്ടിട്ടുണ്ട്.

ത്രാങ്ങാലിയിൽ വീട് കുത്തിത്തുറന്ന് 63 പവൻ സ്വർണവും ഒരു ലക്ഷം രൂപയും കവർന്നുവെന്നായിരുന്നു പരാതി. ബാലകൃഷ്ണനും കുടുംബവും വീട്ടിലില്ലാതിരുന്ന സമയത്ത്, വീടിൻ്റെ മുകൾ നിലയിലെ വാതിൽ കുത്തിത്തുറന്നാണ് താഴെ കിടപ്പുമുറിയിൽ സൂക്ഷിച്ചിരുന്ന സ്വർണവും പണവും കവർന്നതെന്നായിരുന്നു പരാതി. ഒറ്റപ്പാലം പൊലിസ് കേസെടുത്ത് അന്വേഷണം നടത്തുന്നതിനിടെയാണ് സ്വർണ്ണം നഷ്ടപ്പെട്ടിട്ടില്ലെന്ന് വ്യക്തമായത്.

A new twist in the theft in Ottapalam Trangali; 63 Pawan of gold, which was thought to be stolen, was found at home