ഷാര്‍ജ: അല്‍ ദൈദ് ഈത്തപ്പഴ മേള 2024ന്റെ എട്ടാമത് പതിപ്പ് ഇന്നു മുതല്‍ 28 വരെ അല്‍ ദൈദ് എക്‌സ്‌പോ സെന്ററില്‍ നടക്കും. ഷാര്‍ജ ചേംബര്‍ ഓഫ് കൊമേഴ്‌സ് ആന്‍ഡ് ഇന്‍ഡസ്ട്രി (എസ്.സി.സി.ഐ) സംഘടിപ്പിക്കുന്ന ഫെസ്റ്റിവലില്‍ യു.എ.ഇയിലെമ്പാടുമുള്ള ഈത്തപ്പന കര്‍ഷകരും ഈത്തപ്പഴ പ്രേമികളും വിപുലമായ പങ്കാളിത്തം വഹിക്കും. 

ഈ വര്‍ഷത്തെ ഫെസ്റ്റിവല്‍ കുട്ടികള്‍ക്കായി 'റത്ബ് അല്‍ ഖറൈഫ് ബ്യൂട്ടി' എന്ന പേരില്‍ ഒരു പുതിയ മത്സരം അവതരിപ്പിക്കും. വീട്ടില്‍ വളരുന്ന ഏറ്റവും മനോഹരമായ ഈത്തപ്പഴം (സ്ത്രീകള്‍ക്ക് മാത്രം), 'മികച്ച നാരങ്ങകള്‍', 'അത്തി മത്സരം' തുടങ്ങിയ മത്സരങ്ങളുമുണ്ട്. അല്‍ ദൈദിലെയും കിഴക്കന്‍, വടക്കന്‍ മേഖലകളിലെയും കാര്‍ഷിക ഇടങ്ങള്‍ക്കായി സമര്‍പ്പിച്ചിരിക്കുന്ന 'അപൂര്‍വ ഈത്തപ്പഴങ്ങള്‍' മത്സരത്തിന്റെ അരങ്ങേറ്റം കൂടിയാണ് എട്ടാം പതിപ്പ്. വിവിധ വിഭാഗങ്ങളിലായി 130 വിജയികള്‍ക്ക് നല്‍കുന്ന വിലപ്പെട്ട സമ്മാനങ്ങള്‍ക്കായുള്ള കടുത്ത മത്സരം ഫെസ്റ്റിവലില്‍ പ്രതീക്ഷിക്കുന്നു.

ഈ അവാര്‍ഡുകള്‍ പങ്കെടുക്കുന്ന കര്‍ഷകര്‍ക്ക് അവരുടെ പ്രാദേശിക ഈത്തപ്പഴ ഉല്‍പന്നങ്ങളുടെ ഗുണനിലവാരം വര്‍ധിപ്പിക്കുന്നതിന് ശക്തമായ പ്രോത്സാഹനം നല്‍കും.  ഫെസ്റ്റിവലിന്റെ 2024 പതിപ്പില്‍ സാമ്പത്തികവും വാണിജ്യപരവുമായ പരിപാടികളും പ്രവര്‍ത്തനങ്ങളും, നാടോടി ബാന്‍ഡുകളുടെ പ്രകടനങ്ങള്‍, മത്സരങ്ങള്‍, ഈത്തപ്പനകളെയും അവയുടെ വ്യത്യസ്ത ഇനങ്ങളെയും തരങ്ങളെയും കുറിച്ചുള്ള അറിവ് പ്രോത്സാഹിപ്പിക്കുന്നതിനുള്ള വിവിധ സാംസ്‌കാരിക പരിപാടികള്‍ എന്നിവയും അവതരിപ്പിക്കും. 

ഈത്തപ്പഴ കൃഷി പ്രോത്സാഹിപ്പിക്കുന്നതിന് നിരവധി നൂതന മത്സരങ്ങളും വിലയേറിയ സമ്മാനങ്ങളും ഈ വര്‍ഷത്തെ ഫെസ്റ്റിവലില്‍ ഉള്‍പ്പെട്ടിട്ടുണ്ടെന്ന് അല്‍ ദൈദ് ഈത്തപ്പഴം ഫെസ്റ്റിവലിന്റെ ജനറല്‍ കോഡിനേറ്റര്‍ മുഹമ്മദ് മുസാബ അല്‍ തുനൈജി പറഞ്ഞു. എട്ടാം പതിപ്പ് കുട്ടികള്‍ക്കായി ഒരുക്കുന്ന പുതിയ മത്സരം യു.എ.ഇയുടെ സാംസ്‌കാരിക, പൈതൃകവുമായുള്ള അവരുടെ ഇടപഴകല്‍ കൂടുതല്‍ ആഴത്തിലാക്കാനും ഈത്തപ്പനകളുടെ സംരക്ഷണവും കൃഷിയും പ്രോത്സാഹിപ്പിക്കുന്നതിനും രൂപകല്‍പ്പന ചെയ്താണെന്ന് അദ്ദേഹം അഭിപ്രായപ്പെട്ടു.

ഷാര്‍ജ എമിറേറ്റിന്റെ സെന്‍ട്രല്‍ റീജിയനില്‍ നിന്നുള്ള 7 മുതല്‍ 15 വയസുവരെയുള്ള ആണ്‍കുട്ടികള്‍ക്കായി സമര്‍പ്പിച്ചിരിക്കുന്ന 'റത്ബ് അല്‍ ഖറൈഫ് ബ്യൂട്ടി' മത്സരത്തിന്റെ പ്രത്യേക പങ്കാളിത്ത മാനദണ്ഡങ്ങള്‍ സംഘാടക സമിതി രൂപപ്പെടുത്തിയിട്ടുണ്ട്. രാജ്യത്തിന്റെ പൈതൃകവും ദേശീയ സ്വത്വവും ഉറപ്പിക്കുന്നതില്‍ വര്‍ഷങ്ങളായി ഈ ഉത്സവം നിര്‍ണായകമാണ്.