തിരുവനന്തപുരം: ജോലി വേണോ എങ്കിൽ ലഹരി വേണ്ട. മിന്നൽ പരിശോധനയിൽ പിടിവീണാൽ ജോലി പോകുന്നത് മാത്രമല്ല അഴിയെണ്ണേണ്ടിയും വരും. ഐ.ടി മേഖല ഉൾപ്പെടെയുള്ള സ്വകാര്യ സ്ഥാപനങ്ങളെ ലഹരിമുക്തമാക്കാൻ പൊലിസും സ്വകാര്യകമ്പനി ഉടമകളും ഒന്നിക്കുന്നു. ഐ.ടി മേഖലയിലാണ് പ്രധാനമായും ലഹരി ഉപയോഗിക്കുന്നവരുടെ എണ്ണം കൂടുതലുള്ളതെന്ന വിലയിരുത്തലിനെ തുടർന്ന് ഐ.ടി പാർക്കുകളിൽ മിന്നൽ പരിശോധനകൾ നടത്താൻ വിദേശ, സ്വദേശ കമ്പനികൾ പൊലിസിന് അനുമതി നൽകി. ഐ.ടി കമ്പനികൾ ഉൾപ്പെടെ സ്വകാര്യമേഖലയിൽ പുതുതായി ജോലിയിൽ പ്രവേശിക്കുന്നവരിൽ നിന്ന് ലഹരി ഉപയോഗിക്കില്ലെന്ന് കരാർ എഴുതി വാങ്ങും. കരാർ ഒപ്പിടുന്നവർക്ക് മാത്രമേ ജോലിയുള്ളൂ. 
സ്വകാര്യ മേഖലയെ ലഹരി മുക്തമാക്കാൻ പോളിസി ഫോർ പ്രിവെൻഷൻ ഓഫ് ഡ്രഗ് അബൂസ് (പോഡ) എന്ന പേരിൽ നിയമം കൊണ്ടുവരാനാണ് സർക്കാർ തീരുമാനം. അടിയന്തരമായി ഓർഡിനൻസ് ഇറക്കി നിയമസഭാ സമ്മേളനത്തിൽ നിയമമാക്കും. ഇതിന്റെ കരട് പൂർത്തിയായിട്ടുണ്ട്. പൊലിസ് നടത്തുന്ന മിന്നൽ പരിശോധനയിൽ പിടിവീണാൽ ഉടൻ ആനുകൂല്യങ്ങളൊന്നും നൽകാതെ ജോലിയിൽ നിന്ന് പുറത്താക്കാനുള്ള അധികാരം സ്വകാര്യ സ്ഥാപനങ്ങൾക്ക് നൽകുന്ന തരത്തിലാണ് പ്രധാന വ്യവസ്ഥ.     

മൂന്നു മാസത്തിലൊരിക്കൽ ലഹരി ഉപയോഗിക്കുന്നോ എന്നറിയാൻ എല്ലാ സ്വകാര്യ സ്ഥാപനങ്ങളിലെയും ജീവനക്കാരെ പരിശോധിക്കും. രക്തം, മുടി, മൂത്രം എന്നിവയിലൂടെയുള്ള പരിശോധനയിലൂടെ ലഹരി ഉപയോഗം കണ്ടെത്തും. പരിശോധനയ്ക്ക് തയാറായില്ലെങ്കിൽ പിരിച്ചുവിടൽ ഉൾപ്പെടെയുള്ള നടപടിയുണ്ടാകും.

ഒരു തവണ രാസലഹരി ഉപയോഗിച്ചാൽ മൂന്നുമാസം കഴിഞ്ഞ് നടത്തുന്ന പരിശോധനയിൽ പോലും കണ്ടെത്താനാകും. ഐ.ടി പാർക്കുകളിലും സ്വകാര്യ സ്ഥാപനങ്ങളിലും പ്രത്യേകം സ്‌മോക്കിങ് കേന്ദ്രങ്ങളുണ്ട്. ഇവിടെയും ക്യാന്റീനുകൾ, ടോയ്‌ലറ്റുകൾ എന്നിവിടങ്ങളിലും കാംപസിന്റെ വിവിധ ഇടങ്ങളിലും പ്രത്യേക നിരീക്ഷണം ഉണ്ടാകും. 

ഐ.ടി പാർക്കുകളിൽ ലഹരി ഉപയേഗിക്കുന്നവരെന്നു സംശയിക്കുന്നവരെ പ്രത്യേകമായി നിരീക്ഷിക്കും. ഇവരുടെ താമസസ്ഥലങ്ങളിലും മിന്നൽ പരിശോധന ഉണ്ടാകും. രാസലഹരി ഉപയോഗിക്കുന്ന യുവാക്കളിൽ  70 ശതമാനവും മെച്ചപ്പെട്ട ശമ്പളമുള്ള സ്വകാര്യസ്ഥാപനങ്ങളിൽ ജോലി ചെയ്യുന്നവരെന്നാണ് പൊലിസ് കണ്ടെത്തൽ. ഇവരിലെ ലഹരി ഉപയോഗത്തിന് തടയിട്ടാൽ തന്നെ ലഹരിഭീഷണിക്ക് പകുതി പരിഹാരമാകുമെന്നും കരുതുന്നു. 

അതിനായാണ് സ്വകാര്യ സ്ഥാപനങ്ങളിലെ സ്ത്രീ ചൂഷണം തടയാനുള്ള പോഷ് ആക്ട് മാതൃകയിൽ ലഹരി ഉപയോഗം തടയാനായി പ്രത്യേക നയം തയാറാക്കുന്നത്.

Testing in the private sector every three months to detect drug use; no longer in doubt that it will work