നയ്പിഡൊന ബാങ്കോക്ക്: മ്യാന്‍മാറിലുണ്ടായ അതിശക്തമായ ഭൂചലനത്തില്‍ കൊല്ലപ്പെട്ടവരുടെ എണ്ണം 150 കവിഞ്ഞു. ആയിരത്തോളം പേര്‍ക്ക് പരുക്കേറ്റു. ഇപ്പോഴും നിരവധി പേര്‍ തകര്‍ന്ന കെട്ടിടാവശിഷ്ടങ്ങള്‍ക്കിടയില്‍ കുടുങ്ങിക്കുകയാണ്. മരണസംഖ്യ ഇനിയും ഉയരും. ഭൂചലനത്തില്‍ ആയിരക്കണക്കിന് പേര്‍ മരിച്ചിരിക്കാമെന്ന് യുഎസ് ജിയോളജിക്കല്‍ സര്‍വേ പ്രവചിച്ചു.

മ്യാന്‍മറിലെ പട്ടാള മേധാവി മിന്‍ ഓങ് ഫ്‌ലെയിങ് 'അടിയന്തരാവസ്ഥ' പ്രഖ്യാപിച്ച് അന്താരാഷ്ട്ര സഹായം അഭ്യര്‍ത്ഥിച്ചു. ആറ് പ്രവിശ്യകളിലും തായ്‌ലന്‍ഡിലെ തലസ്ഥാനം ബാങ്കോക്കിലുമാണ് അടിയന്തരാവസ്ഥ പ്രഖ്യാപിച്ചിരിക്കുന്നത്. ദുരന്തത്തിന്റെ വ്യാപ്തിയെക്കുറിച്ചുള്ള വ്യക്തതയില്ലെങ്കിലും, സാമൂഹ്യമാധ്യമങ്ങളില്‍ വ്യാപകമായി പ്രചരിക്കുന്ന ദൃശ്യങ്ങളില്‍ വീടുകളും റോഡുകളും തകര്‍ന്നതും നിരവധി പേര്‍ കുടുങ്ങിയതുമാണ് കാണുന്നത്.

ശക്തമായ ഭൂചലനത്തില്‍ മ്യാന്‍മറിലും തായ്‌ലന്‍ഡിലും കെട്ടിടങ്ങള്‍ തകര്‍ന്നതിനെ തുടര്‍ന്ന് രക്ഷാപ്രവര്‍ത്തനം പുരോഗമിക്കുകയാണ്. അതിനാല്‍ തന്നെ മരണസംഖ്യ ഇനിയും ഉയരാന്‍ സാധ്യതയുണ്ടെന്ന് ദുരന്ത നിവാരണ സംഘങ്ങള്‍ അറിയിച്ചു. ബാങ്കോക്കില്‍ മെട്രോ, റെയില്‍ സര്‍വീസുകള്‍ താത്കാലികമായി നിര്‍ത്തിവെച്ചിരിക്കുകയാണ്. തായ്‌ലന്‍ഡ് പ്രധാനമന്ത്രി പേടോങ്ടാണ്‍ ഷിനാവത്ര ഫൂക്കറ്റിലേക്കുള്ള ഔദ്യോഗിക സന്ദര്‍ശനം റദ്ദാക്കിയ ശേഷമാണ് നഗരത്തില്‍ അടിയന്തരാവസ്ഥ പ്രഖ്യാപിച്ചത്.

തായ്‌ലന്റ് പ്രധാനമന്ത്രിയും സര്‍ക്കാര്‍ അധികാരികളും സൈനിക കമാന്‍ഡറുമായി വൈകിട്ട് അഞ്ചോടെ കൂടിക്കാഴ്ച നടത്തി. സൈന്യത്തിലെ ഡിസാസ്റ്റര്‍ റിലീഫ് സെന്റര്‍, സൈനികര്‍ എന്നിവയുടെ സഹായത്തോടെ രക്ഷാപ്രവര്‍ത്തനത്തിന് സൈന്യം ഉത്തരവു നല്‍കി. രക്ഷാ ഉപകരണങ്ങളും ഉപയോഗിക്കും. സൈന്യത്തിന്റെ മെഡിക്കല്‍ യൂനിറ്റുകളും ദുരന്ത സ്ഥലത്തെത്തിച്ചു. ബാങ്കോക്കില്‍ നിര്‍മാണത്തിലിരിക്കുന്ന ബഹുനില കെട്ടിടം നിലം പതിച്ചു. 81തൊഴിലാളികള്‍ ഇതിനുള്ളില്‍ കുടുങ്ങിക്കിടക്കുന്നതായി ഉപ പ്രധാനമന്ത്രി പറഞ്ഞു. രണ്ടു പ്രധാന ടെലികോം കമ്പനികളും തകര്‍ന്നതിനാല്‍ ആയശവിനിമയം മുടങ്ങി. വൈദ്യുതി വിതരണവും തടസ്സപ്പെട്ടു.

പള്ളി തകര്‍ന്ന് 20 പേര്‍ മരിച്ചു

മ്യാന്‍മറിലെ ശക്തമായ ഭൂചലനത്തില്‍ പള്ളി തകര്‍ന്ന് 20 പേര്‍ കൊല്ലപ്പെട്ടു. ഭൂചലനം ഏറ്റവും കൂടുതല്‍ നാശനഷ്ടം വിതച്ച മണ്ഡാലെ മേഖലയില്‍ ആണ് സംഭവം. ഇവിടെ ഇരട്ട ഭൂചലനങ്ങള്‍ വ്യാപക നാശനഷ്ടം ഉണ്ടാക്കിയിരുന്നു. പ്രാദേശിക മാധ്യമങ്ങളാണ് പള്ളി തകര്‍ന്ന് 20 പേര്‍ മരിച്ചത് റിപ്പോര്‍ട്ട് ചെയ്തത്. റമദാനിലെ അവസാന വെള്ളിയാഴ്ചയായ ഇന്നലെ ജുമുഅ നിസ്‌കാരത്തിനെത്തിയവരാണ് മരിച്ചത്.

ഇന്ത്യ 15 ടണ്‍ ദുരിതാശ്വാസ വസ്തുക്കള്‍ അയച്ചു

ഭൂകമ്പം തകര്‍ത്ത അയല്‍രാജ്യമായ മ്യാന്‍മറിനെ സഹായിച്ച് ഇന്ത്യ. ഹിന്‍ഡണ്‍ വ്യോമസേനാ കേന്ദ്രത്തില്‍ നിന്ന്  ഐഎഎഫ് സി 130ജെ വിമാനത്തില്‍ ഭൂകമ്പബാധിത മ്യാന്‍മറിലേക്ക് ഏകദേശം 15 ടണ്‍ ദുരിതാശ്വാസ വസ്തുക്കള്‍ അയച്ചു. ടെന്റുകള്‍, സ്ലീപ്പിംഗ് ബാഗുകള്‍, പുതപ്പുകള്‍, ഭക്ഷണം, വാട്ടര്‍ പ്യൂരിഫയറുകള്‍, ശുചിത്വ കിറ്റുകള്‍, ടിവി, സോളാര്‍ ലാമ്പുകള്‍, ജനറേറ്റര്‍ സെറ്റുകള്‍, പാരസെറ്റമോള്‍, ആന്റിബയോട്ടിക്കുകള്‍, കാനുല, സിറിഞ്ചുകള്‍, കയ്യുറകള്‍, കോട്ടണ്‍ ബാന്‍ഡേജുകള്‍, മൂത്ര ബാഗുകള്‍ തുടങ്ങിയ അവശ്യ മരുന്നുകള്‍ എന്നിവയായിരുന്നു അയച്ച ദുരിതാശ്വാസ വസ്തുക്കള്‍.

വെള്ളിയാഴ്ച പ്രാദേശിക സമയം ഉച്ചയ്ക്ക് 12.50നാണ് മധ്യ മ്യാന്‍മറില്‍ 7.7 തീവ്രത രേഖപ്പെടുത്തിയ പ്രധാന ഭൂചലനം അനുഭവപ്പെട്ടത്. പിന്നാലെ 6.8 തീവ്രതയുള്ള അനുബന്ധ ചലനവും ഉണ്ടായതായി യുഎസ് ജിയോളജിക്കല്‍ സര്‍വേ സ്ഥിരീകരിച്ചു. സാഗൈംഗ് നഗരത്തിന് 16 കിലോമീറ്റര്‍ വടക്കുപടിഞ്ഞാറായും 10 കിലോമീറ്റര്‍ താഴ്ചയില്‍വുമാണ് ഭൂചലനത്തിന്റെ പ്രഭവകേന്ദ്രമെന്ന് റിപ്പോര്‍ട്ടില്‍ പറയുന്നു.

Over 150 Killed, Hundreds Injured As Earthquakes Hit Myanmar, Bangkok