ദുബൈ: ജിസിസി ഏകീകൃത വിസ നടപ്പിലാക്കാനുള്ള ശ്രമങ്ങള്‍ നിലവില്‍ തടസ്സപ്പെട്ടിരിക്കുകയാണ്. സുരക്ഷാ പ്രശ്‌നങ്ങളും വ്യത്യസ്ത ദേശീയ വീക്ഷണങ്ങളും വിസ നടപ്പിലാക്കുന്നതില്‍ ഗണ്യമായ കാലതാമസത്തിന് വഴിയൊരുക്കുന്നുവെന്ന് ഒമാന്‍ ടൂറിസം പൈതൃക മന്ത്രി വ്യക്തമാക്കി. 

2023ല്‍ ആരംഭിച്ച ഏകീകൃത വിസ പദ്ധതിക്ക് ഔദ്യോഗിക അംഗീകാരം ലഭിച്ചെങ്കിലും, ഇക്കാര്യത്തില്‍ ഇപ്പോഴും പഠനങ്ങള്‍ നടക്കുകയാണെന്നും, സമീപകാലത്ത് ഇത് നടപ്പിലാക്കാന്‍ സാധ്യതയില്ലെന്നും ഷൂറ കൗണ്‍സിലിന്റെ എട്ടാമത്തെ പതിവ് സെഷനില്‍ സംസാരിച്ചു കൊണ്ടിരിക്കെ സലിം ബിന്‍ മുഹമ്മദ് അല്‍ മഹ്റൂഖി കൂട്ടിച്ചേര്‍ത്തു.

ജിസിസി ഏകീകൃത വിസയെക്കുറിച്ച് ഇപ്പോഴും പഠനങ്ങള്‍ നടക്കുകയാണ്.  ബഹ്‌റൈന്‍, കുവൈത്ത്‌, ഒമാന്‍, യുഎഇ, ഖത്തര്‍, സഊദി അറേബ്യ എന്നീ ആറ് ജിസിസി രാജ്യങ്ങള്‍ക്കിടയില്‍ ഏകീകൃത വിസയെക്കുറിച്ച് നിലനില്‍ക്കുന്ന പരിഹരിക്കപ്പെടാത്ത സുരക്ഷാ ആശങ്കകള്‍ ചൂണ്ടിക്കാട്ടി അല്‍ മഹ്‌റൂഖി കൗണ്‍സില്‍ അംഗങ്ങളോട് പറഞ്ഞു. 

യൂറോപ്പിലെ ഷെഞ്ചെന്‍ വിസക്ക് സമാനമായ ഈ പദ്ധതി പ്രകാരം സഞ്ചാരികള്‍ക്ക് ഒരൊറ്റ വിസ ഉപയോഗിച്ച് ആറ് രാജ്യങ്ങളില്‍ സഞ്ചരിക്കാന്‍ സാധിക്കും. ഇത് ഗള്‍ഫ് മേഖലയിലേക്ക് കൂടുതല്‍ സഞ്ചാരികളെ എത്തിക്കുകയും സാമ്പത്തിക സഹകരണം വളര്‍ത്താന്‍ സഹായിക്കുകയും ചെയ്യുമെന്നാണ് കരുതുന്നത്.  

അതേസമയം, സുരക്ഷാ പ്രശ്‌നങ്ങള്‍, കുടിയേറ്റ നിയന്ത്രണം, ഡാറ്റ ഷെയറിംഗ് തുടങ്ങിയ പ്രധാന ആശങ്കകള്‍ നിലനില്‍ക്കുന്നതിനാല്‍ ജിസിസി ഏകീകൃത വിസ നടപ്പിലാക്കുന്നതിന് തടസം നേരിടുകയാണ്.

Oman’s Tourism Minister has stated that security concerns are causing delays in the implementation of the Gulf Cooperation Council (GCC) unified visa. The visa, aimed at easing travel within the member countries, faces hurdles due to security-related challenges.