മലപ്പുറം: സാമ്പത്തിക വർഷത്തിന്റെ അവസാനത്തിലെത്തിയിട്ടും ന്യൂനപക്ഷ ക്ഷേമത്തിന് വകയിരുത്തിയ 73.63 കോടിയിൽ ഇതുവരേ ചെലവിട്ടത് 5.94 കോടി രൂപ മാത്രം. 2024-2025 ൽ നൂനപക്ഷക്ഷേമ ഡയരക്ടറേറ്റിന് 73,63,000,00 രൂപയാണ് വകയിരുത്തിയത്.  എന്നാൽ ഇതിൽ 5,94,94,376 രൂപയാണ് ചെലവിട്ടത്. 14 പദ്ധതികളിൽ ആറെണ്ണത്തിന് നയാ പൈസ നൽകിയിട്ടില്ല. പൂർണമായും ചെലവിട്ടത് ഓഫിസ് ആധുനികവത്കരണത്തിന് അനുവദിച്ച 40 ലക്ഷം മാത്രമാണ്.

എ.പി.ജെ അബ്ദുൽ കലാം സ്‌കോളർഷിപ്പ്, ജോസഫ് മുണ്ടശ്ശേരി സ്‌കോളർഷിപ്പ്, പ്രധാൻമന്ത്രി ജൻ വികാസ് കാരിക്രം, കാലിക്കറ്റ് സർവകലാശാലക്ക് കീഴിൽ ന്യൂനപക്ഷ ഗവേഷണസ്ഥാപനം സ്ഥാപിക്കൽ, വിധവകൾക്കുള്ള സ്വയംതൊഴിൽ പദ്ധതി, ഒന്നുമുതൽ എട്ടുവരേ ക്ലാസുകളിലെ വിദ്യാർഥികൾക്കുള്ള പ്രീമെട്രിക് സ്‌കോളർഷിപ്പ് മാർഗദീപം പദ്ധതി എന്നിവക്കാണ് ഇതുവരേ ഫണ്ട് ചെലവിടാത്തത്. ന്യൂനപക്ഷ വിഭാഗത്തിലെ വിധവകൾക്ക് സ്വയം തൊഴിൽ പദ്ധതിക്കായി നീക്കിവച്ചിരിക്കുന്നത് അഞ്ചുകോടി രൂപയാണ്. കാലിക്കറ്റ് സർവകലാശാലയുടെ കീഴിൽ ന്യൂനപക്ഷ ഗവേഷണ സ്ഥാപനം സ്ഥാപിക്കുന്നതിന് 10 കോടിയാണ് അനുവദിച്ചത്. 

ഈ രണ്ട് ഫയലും ഇതുവരേ അനങ്ങിയിട്ടില്ല. വിവാഹപൂർവ കൗൺസിലിങ് സോഫ്റ്റ് സ്‌കിൽ വികസനത്തിനായി 50 ലക്ഷത്തിൽ 28 ലക്ഷമാണ് ഇതുവരേ ചെലവിട്ടത്. ഐടി.ഐ-ഫീ റീ ഇബ്ലേഴ്‌സ്മെന്റ് സ്‌കീം 5.82 കോടിയിൽ ചെലവിട്ടത് 48,380 രൂപയാണ്.  ഇമ്പിച്ചി ബാവ ഭവന, പുനരുദ്ധാരണ പദ്ധതി അഞ്ച് കോടിയിൽ ചെലവിട്ടത് 1.72 കോടിമാത്രം. മദർ തെരേസ സ്‌കോളർഷിപ്പിൽ 68 ലക്ഷത്തിൽ എന്നാൽ ചെലവിട്ടത്  48,380 രൂപ മാത്രവും. കരിയർ ഗൈഡൻസ് പരിശീലന പരിപാടിയിൽ 1.20 കോടിയിൽ 39,22,797 രൂപയും, സി.എ സ്‌കോളർഷിപ്പിൽ 97 ലക്ഷത്തിൽ 10.07 ലക്ഷവുമാണ് ആകെ ചെലവഴിച്ചത്.