ദുബൈ :റമദാനിൽ ദുബൈയിലെ ഷോപ്പിങ് മാളുകൾ രാത്രി വൈകിയും പ്രവർത്തിക്കും. താമസക്കാർക്കായി വിവിധങ്ങളായ സാംസ്‌കാരിക പരിപാടികൾ, ഇഫ്താർ, സുഹൂർ ഒത്തുചേരലുകൾ, ആകർഷകമായ ഓഫറുകൾ, വെടിക്കെട്ട് പ്രദർശനങ്ങൾ, എന്നിങ്ങനെ നിരവധി പരിപാടികളാണ് എല്ലാ ദിവസവും ദുബൈ ഒരുക്കിയിരിക്കുന്നത്.

അൽ സീഫ്, ബ്ലൂ വാട്ടേഴ്‌സ് ഐലൻഡ്, ഫെസ്റ്റിവൽ സിറ്റി, ദ ബീച്ച്, ജെ.ബി.ആർ. എന്നിവിടങ്ങളിലെല്ലാം കരിമരുന്ന് പ്രദർശനമുണ്ടാകും. അൽ സീഫ്, മിർദിഫ് സിറ്റി സെൻ്റർ, ഔട്ട്‌ലെറ്റ് വില്ലേജ്, ബ്ലൂവാട്ടേഴ്‌സ് ഐലൻഡ്, ഹത്ത ഹെറിറ്റേജ് വില്ലേജ് തുടങ്ങിയ സ്ഥലങ്ങളിൽ എല്ലാ വാരാന്ത്യത്തിലും സാംസ്‌കാരിക പരിപാടികൾ സംഘടിപ്പിക്കും. ദുബൈയിലെ വിവിധയിടങ്ങളിലായി റംസാൻ മാർക്കറ്റുകളും സജീവമാണ്.

2025 സാമൂഹിക വർഷമായി ആചരിക്കുന്നതിന്റെ ഭാ​ഗമായി മാർച്ച് 26 വരെ റംസാൻ അറ്റ് ദ പാർക്ക് എന്ന ആഘോഷപരിപാടിയുടെ ആദ്യപതിപ്പ്  സബീൽ പാർക്ക് ആംഫി തിയേറ്ററിൽ അരങ്ങേറും. തിങ്കൾ മുതൽ വ്യാഴം വരെ വൈകുന്നേരം അഞ്ച് മുതൽ പുലർച്ചെ 12 വരെയും, വെള്ളി മുതൽ ഞായർ വരെ അർധരാത്രി ഒരു മണിവരെയുമാണ് പരിപാടി നടക്കുന്നത്. ഇവിടെ ഇഫ്‌താറും സുഹൂറും ഒരുക്കും.

ദുബൈ പൊലിസിൻ്റെ റംസാൻ പീരങ്കി, സാംസ്‌കാരിക പ്രദർശനങ്ങൾ എന്നിവയും കാണാൻ സാധിക്കും. വസ്ത്രങ്ങൾ, ആഭരണങ്ങൾ, ബാഗുകൾ, കരകൗശല വസ്തുക്കൾ എന്നിവയുടെയെല്ലാം ​ഗംഭീര ശേഖരമുള്ള റംസാൻ മാർക്കറ്റും ഇവിടെയുണ്ട്. ഈ മാസം 27 വരെ ദുബൈ എക്സ്പോ സിറ്റിയിൽ ഹായ് റംസാൻ പരിപാടി നടക്കും. ഒട്ടക സവാരി, അൽ വാസൽ പ്ലാസക്ക് കീഴിൽ പ്രത്യേക ഭക്ഷണം തുടങ്ങിയവയെല്ലാം ഇവിടെ ഒരുക്കിയിട്ടുണ്ട്.

ഗ്ലോബൽ വില്ലേജിലും പ്രത്യേക റംസാൻ പ്രദർശനങ്ങളുണ്ട്. 3500-ലേറെ ഔട്ട്ലെറ്റുകളിലെ ഷോപ്പിങ് അനുഭവം, 90-ലേറെ സംസ്കാരങ്ങളുടെ പ്രദർശനം തുടങ്ങിയവയെല്ലാം ഇവിടെ സന്ദർശകർക്കായി കാത്തിരിക്കുന്നു. ഈ മാസം 23 വരെ ജുമൈര എമിറേറ്റ്സ് ടവേഴ്‌സിൽ പ്രവർത്തിക്കുന്ന സൗജന്യ പ്രവേശനമുള്ള റംസാൻ ഡിസ്ട്രിക്ട് മാർക്കറ്റും ഒരു പ്രധാന ആകർഷണമാണ്. ഉം സുഖീം അക്കാദമി പാർക്കിലെ റൈപ്പ് മാർക്കറ്റിലും സന്ദർശകരുടെ തിരക്ക് അനുഭവപ്പെടുന്നുണ്ട്. ഈ മാസം 23 വരെ കറാമയിലെ ശൈഖ് ഹംദാൻ കോളനിയിൽ റംസാൻ സ്ട്രീറ്റ് ഫുഡ് ഫെസ്റ്റിവൽ അരങ്ങേറും. അഞ്ച് വിശാലമായ സോണുകളിലായി 55ലേറെ റസ്റ്റോറൻ്റുകളാണ് ഫെസ്റ്റിവലിൽ പങ്കെടുക്കുന്നത്.

Dubai malls are extending their operating hours during Ramadan, offering a vibrant experience with fireworks, live performances, and various activities, making the holy month a memorable one for residents and visitors.