ആലപ്പുഴ: യു. പ്രതിഭ എം.എല്‍.എയുടെ മകനെതിരായ കഞ്ചാവ് കേസില്‍ രണ്ട് സാക്ഷികള്‍ മൊഴിമാറ്റി. കഞ്ചാവ് ഉപയോഗം കണ്ടില്ല എന്നാണ് സാക്ഷികള്‍ മൊഴി മാറ്റിയത്. തകഴി സ്വദേശികളായ അജിത്തും കുഞ്ഞുമോനുമാണ് കേസിലെ പ്രധാന സാക്ഷികള്‍. യു പ്രതിഭയുടെ പരാതിയില്‍ നടത്തിയ അന്വേഷണത്തിലാണ് എക്‌സൈസ് അസിസ്റ്റന്റ് കമ്മീഷണര്‍ക്ക് മുന്‍പില്‍ മൊഴി മാറ്റിയത്. അന്വേഷണ റിപ്പോര്‍ട്ട് എക്‌സൈസ് കമ്മീഷണര്‍ക്ക് കൈമാറിയിരുന്നു.

യു. പ്രതിഭ എം.എല്‍.എയുടെ മകന്‍ കനിവ് പ്രതിയായ കഞ്ചാവ് കേസില്‍ എക്സൈസ് ഉദ്യോഗസ്ഥരുടെ നടപടികളില്‍ വീഴ്ച സംഭവിച്ചുവെന്നും വൈദ്യ പരിശോധന നടത്തിയില്ലെന്നുമാണ് റിപ്പോര്‍ട്ടില്‍ പറയുന്നത്. എക്സൈസ് ഉദ്യോഗസ്ഥര്‍ക്കെതിരെ പ്രതിഭ എം.എല്‍.എ നല്‍കിയ പരാതിയിലാണ് അസി.എക്സൈസ് കമ്മീഷണര്‍ എസ് അശോക് കുമാറാണ് റിപ്പോര്‍ട്ട് നല്‍കിയത്.

ഡിസംബര്‍ 28 നാണ് എം.എല്‍.എയുടെ മകന്‍ കനവ് ഉള്‍പ്പെടെ 9 പേരെ തകഴിയില്‍ നിന്ന് പിടികൂടിയത്. ഇവരില്‍ നിന്ന് മൂന്ന് ഗ്രാം കഞ്ചാവും പിടികൂടിയിരുന്നു. രണ്ടുപേരില്‍ നിന്നായാണ് കഞ്ചാവ് കണ്ടെടുത്തത്. മറ്റുള്ളവര്‍ക്കെതിരെ കഞ്ചാവ് ഉപയോഗിച്ചതിനായിരുന്നു കേസെടുത്തിരുന്നത്. എന്നാല്‍ ഇവര്‍ കഞ്ചാവ് ഉപയോഗിച്ചതിന് ദൃക്സാക്ഷികളില്ല. മെഡിക്കല്‍ പരിശോധന നടത്തുന്നതിലും വീഴ്ച സംഭവിച്ചു.

ശ്വാസത്തില്‍ നിന്ന് കഞ്ചാവിന്റെ ഗന്ധമുണ്ടായിരുന്നു എന്ന് മാത്രമാണ് പറയുന്നത്. 7 പേര്‍ക്കെതിരെ കേസെടുക്കാന്‍ ഇത് മതിയാവില്ലെന്നും റിപ്പോര്‍ട്ടിലുണ്ട്. തീപ്പെട്ടിയോ കഞ്ചാവ് വലിച്ചതിന്റ അവശിഷ്ടങ്ങളും കണ്ടെത്തിയിട്ടില്ല. രക്തം, മുടി, നഖം എന്നിവയുടെ സാമ്പിളുകള്‍ ശേഖരിച്ച് കഞ്ചാവ് വലിച്ചോ എന്ന് പരിശോധിക്കേണ്ടിയിരുന്നു. ഒരു പരിശോധനയും നടത്തിയില്ലെന്നും റിപ്പോര്‍ട്ടിലുണ്ട്.

മകന്‍ കേസിലുള്‍പ്പെട്ടിരുന്നോ എന്നത് എം.എല്‍.എ എക്സൈസ് ഉദ്യോഗസ്ഥരെ വിളിച്ച് അന്വേഷിച്ചപ്പോള്‍ ഇല്ലെന്നായിരുന്നും ഉദ്യോഗസ്ഥര്‍ പറഞ്ഞത്. ഇതിന്റെ അടിസ്ഥാനത്തിലായിരുന്നു യു.പ്രതിഭ എം.എല്‍.എ സാമൂഹ്യമാധ്യമങ്ങളില്‍ കുറിപ്പു പങ്കുവെച്ചതെന്നും റിപ്പോര്‍ട്ടില്‍ പറയുന്നു.