ആലപ്പുഴ: കായംകുളം വള്ളിക്കുന്നത്ത് ആറുപേരെ ആക്രമിച്ച തെരുവുനായയെ പിടികൂടി. അമ്പലപ്പുഴയില്‍ നിന്നെത്തിയ സംഘമാണ് നായയെ പിടികൂടിയത്. ഈ തെരുവു നായ ഇന്നലെ ആറുപേരെയാണ് കടിച്ചത്. പടയിണവട്ടം പുതുപ്പുരയ്ക്കല്‍ തോത്തോലില്‍ ഗംഗാധരന്‍(50), സഹോദരന്‍ രാമചന്ദ്രന്‍ (55), പുതുപ്പുരയ്ക്കല്‍ കിഴക്കതില്‍ ഹരികുമാര്‍, പള്ളിമുക്ക് പടീറ്റതില്‍ മറിയാമ്മ രാജന്‍(70) എന്നിവരെയാണ് തെരുവുനായ കടിച്ചത്.

ഗംഗാധരന്റെയും മറിയാമ്മയുടെയും മൂക്കും മുഖവും തെരുവുനായ കടിച്ചുകീറിയിരുന്നു. ഹരികുമാറിനെ വയറിലാണ് കടിച്ചത്. രാമചന്ദ്രന് കാലിലുമാണ് കടിയേറ്റത്. നായയുടെ കടിയേറ്റ ഗംഗാധരന്‍ ബഹളമുണ്ടാക്കുന്നത് കേട്ട് രക്ഷിക്കാനെത്തിയപ്പോഴാണ് രാമചന്ദ്രനും കടിയേറ്റത്. അയല്‍വാസിയുടെ ബന്ധുവിന്റെ കുട്ടിയെ കടിക്കാന്‍ നായ ഓടിക്കുന്നത് കണ്ടാണ് മറിയാമ്മ രക്ഷിക്കാന്‍ ഇറങ്ങിയത്. ഇതിനിടയിലാണ് നായ മറിയാമ്മയെ ആക്രമിച്ചത്.