തൃപ്രങ്ങോട്: കഴിഞ്ഞ ബജറ്റില്‍ പഞ്ചായത്ത് പ്രഖ്യാപിച്ച സ്ത്രീകള്‍ക്കും കുട്ടികള്‍ക്കും സൗജന്യ യാത്രക്കുള്ള ബസ് എന്ന സ്വപ്‌ന പദ്ധതി യാഥാര്‍ഥ്യമാകുന്നു. 10 ലക്ഷം രൂപ ബജറ്റില്‍ നീക്കി വച്ച പദ്ധതിക്ക് അനുമതി ലഭിക്കാന്‍ ഏറെ കടമ്പകള്‍ കടക്കേണ്ടി വന്നെങ്കിലും പരീക്ഷണ ഓട്ടത്തിനുവേണ്ടി കെ.എസ്.ആര്‍.ടി.സി ബസ് കഴിഞ്ഞ ദിവസം തൃപ്രങ്ങോട്ടെത്തിയിരുന്നു.

 ആവേശത്തോടെയാണ് നാട്ടുകാര്‍ ബസിനെ സ്വീകരിച്ചത്. കന്നി ഓട്ടം വിജയകരുവമായി. ഫെബ്രുവരി ആദ്യത്തെ ആഴ്ച തന്നെ ബസിനെ സ്ഥിരം ഓടിപ്പിക്കാനാണ് ഭരണസമിതിയുടെ തീരുമാനം. രാവിലെ ഏഴു മുതല്‍ വൈകിട്ട് ഏഴുവരെ ബസ് പഞ്ചായത്തില്‍ ഓടിക്കൊണ്ടിരിക്കുന്നതാണ്.

 ജോലിക്കായി പോകുന്ന സ്ത്രീകള്‍ക്കും വിദ്യാലയങ്ങളിലേക്കു പോകുന്ന കുട്ടികള്‍ക്കുമൊക്കെ ഇനി പണം കൊടുക്കാതെ ബസില്‍ യാത്ര ചെയ്യാവുന്നതാണ്. ഉദ്ദേശിക്കുന്ന സ്ഥലത്തു തന്നെ ഇങ്ങുകയും ചെയ്യാം. പരുഷന്‍മാര്‍ക്കും ഈ ബസില്‍ കയറാം. പക്ഷേ, കാഷ് കൊടുക്കണം. സൗജന്യ യാത്ര അനുവദിക്കുന്നതല്ല. ഒരു ഗ്രാമപഞ്ചായത്ത് സംസ്ഥാനത്ത് ആദ്യമായാണ് ഇങ്ങനെയൊരു പദ്ധതി നടത്തുന്നത്.