കൊൽക്കത്ത: ഇംഗ്ലണ്ടിനെതിരായ ടി-20 പരമ്പരയിലെ ആദ്യ മത്സരത്തിൽ ഇന്ത്യ ഏഴ് വിക്കറ്റുകളുടെ തകർപ്പൻ വിജയമാണ് സ്വന്തമാക്കിയത്. മത്സരത്തിൽ ആദ്യം ബാറ്റ് ചെയ്ത ഇംഗ്ലണ്ട് 20 ഓവറിൽ 132 റൺസിന്‌ പുറത്താവുകയായിരുന്നു. വിജയലക്ഷ്യം പിന്തുടർന്നിറങ്ങിയ ഇന്ത്യ മൂന്ന് വിക്കറ്റ് നഷ്ടത്തിൽ ലക്ഷ്യം മറികടക്കുകയായിരുന്നു. മത്സരശേഷം ഇന്ത്യയുടെ വിജയത്തെക്കുറിച്ചും സഞ്ജു സാംസണിന്റെ ബാറ്റിങ്ങിനെക്കുറിച്ചും അഭിഷേക് ശർമ്മ സംസാരിച്ചു. സഞ്ജു ബാറ്റ് ചെയ്യുമ്പോൾ മറുവശത്ത് നിന്നും താൻ ആസ്വദിച്ചുവെന്നാണ് അഭിഷേക് ശർമ്മ പറഞ്ഞത്. 

'എന്റെ സ്വാഭാവികമായ കളി പുറത്തെടുക്കാൻ ഞാൻ ആഗ്രഹിച്ചു. അതിനു ക്യാപ്റ്റനും കോച്ചിനും ഒരുപാട് നന്ദി. അവർ എനിക്ക് വളരെയധികം സ്വാതന്ത്രം നൽകി. അവർ യുവതാരങ്ങൾക്ക് നൽകുന്ന പ്രചോദനം വളരെ വലുതാണ്. ബാറ്റിങ്ങിനും ബൗളിങ്ങിനും അനുകൂലമായ പിച്ചായിരുന്നു ഈഡൻ ഗാർഡനിലേത്. ഞങ്ങളുടെ ബൗളർമാർ മികച്ച രീതിയിൽ ബൗൾ ചെയ്തു. 160 -170 റൺസ് പിന്തുടരേണ്ടി വരുമെന്നാണ് ഞങ്ങൾ കരുതിയത്. എന്നാൽ ബൗളർമാർ ചെറിയ സ്‌കോറിൽ ഇംഗ്ലണ്ട് ഇന്നിംഗ്സ് അവസാനിപ്പിച്ചു. സഞ്ജു ബാറ്റ് ചെയ്യുമ്പോൾ ഞാൻ മറുവശത്ത് നിന്നും ആസ്വദിച്ചിരുന്നു. ഈ കളിയിൽ ഞങ്ങളുടെ പ്ലാനുകൾ വളരെ സിമ്പിളായിരുന്നു. ഐപിഎൽ എന്നെ ഒരുപാട് സഹായിച്ചു. ഇതുപോലൊരു ടീം അന്തരീക്ഷം ഞാൻ എവിടെയും കണ്ടിട്ടില്ല. ക്യാപ്റ്റനും പരിശീലകനും ഞങ്ങളുടെ ശൈലിയിൽ കളിയ്ക്കാൻ പൂർണ സ്വാതന്ത്രം നൽകുന്നുണ്ട്,' അഭിഷേക് ശർമ്മ പറഞ്ഞു.  

അഭിഷേക് ശർമയുടെ ബാറ്റിംഗ് കരുത്തിലാണ് ഇന്ത്യ വിജയം സ്വന്തമാക്കിയത്. 34 പന്തിൽ 79 റൺസാണ് അഭിഷേക് നേടിയത്. മൂന്ന് ഫോറുകളും എട്ട് കൂറ്റൻ സിക്സുകളുമാണ് താരത്തിന്റെ ബാറ്റിൽ നിന്നും പിറന്നത്. സഞ്ജു സാംസൺ 20 പന്തിൽ 26 റൺസും നേടി നിർണായകമായി. 

വിജയത്തോടെ അഞ്ചു മത്സരങ്ങളുടെ പരമ്പരയിൽ 1-0ത്തിനു മുന്നിലെത്താനും ഇന്ത്യക്ക് സാധിച്ചു. ജനുവരി 25നാണ് പരമ്പരയിലെ രണ്ടാം മത്സരം നടക്കുന്നത്. ചെന്നൈ ചെപ്പോക് സ്റ്റേഡിയത്തിലാണ് മത്സരം നടക്കുക.