ലണ്ടൻ: ഇംഗ്ലീഷ് പ്രീമിയർ ലീഗിൽ വിജയകുതിപ്പ് തുടർന്ന് ആഴ്‌സണൽ. ടോട്ടൻഹാം ഹോട്സ്പറിനെ സ്വന്തം തട്ടകത്തിൽ ഒന്നിനെതിരെ രണ്ട്‌ ഗോളുകൾക്കാണ് പീരങ്കിപട വീഴ്ത്തിയത്. ഇംഗ്ലീഷ് പ്രീമിയർ ലീഗിന്റെ ചരിത്രത്തിൽ ഇതാദ്യമായാണ് ആഴ്‌സണൽ തുടർച്ചയായ മൂന്ന് മത്സരങ്ങളിൽ ടോട്ടൻഹാമിനെ പരാജയപ്പെടുത്തുന്നത്. 

മത്സരത്തിൽ 20ാം മിനിറ്റിൽ സണ്ണിന്റെ ഗോളിലൂടെ സ്പർസ്‌ ആണ് ആദ്യം ലീഡ് നേടിയത്. 40 മിനിറ്റിൽ ഡൊമിനിക് സോലങ്കയിലൂടെ ആഴ്‌സണൽ ഗോൾ തിരിച്ചടിച്ചു. പിന്നീട് നാല് മിനിറ്റുകൾക്ക് ശേഷം ലിയനാഡ്രോ ട്രോസാർഡിലൂടെ ആഴ്‌സണൽ വിജയഗോൾ നേടുകയായിരുന്നു.

മത്സരത്തിൽ ബോൾ പൊസഷനിലും ഷോട്ടുകളുടെ എണ്ണത്തിലും ആഴ്‌സണൽ തന്നെയായിരുന്നു മുന്നിൽ ഉണ്ടായിരുന്നത്. 54 ശതമാനം ബോൾ കൈവശം വെച്ച ആഴ്‌സണൽ 14 ഷോട്ടുകളാണ് ടോട്ടൻഹാമിന്റെ പോസ്റ്റിലേക്ക് ആഴ്‌സണൽ ഉതിർത്തത്. ഇതിൽ നാല് ഷോട്ടുകൾ ലക്ഷ്യത്തിൽ എത്തിക്കാനും ആഴ്സണലിന്‌ സാധിച്ചു. 

വിജയത്തോടെ ഇംഗ്ലീഷ് പ്രീമിയർ ലീഗ് പോയിന്റ് ടേബിളിൽ രണ്ടാം സ്ഥാനത്തേക്ക് മുന്നേറാനും ആഴ്സണലിന്‌ സാധിച്ചു. 21 മത്സരങ്ങൾ പിന്നിട്ടപ്പോൾ 12 വിജയവും ഏഴ് സമനിലയും രണ്ട്‌ തോൽവിയുമായി 43 പോയിന്റാണ് ആഴ്സണലിനുള്ളത്. ജനുവരി 18ന് ആസ്റ്റൺ വില്ലക്കെതിരെയാണ് ആഴ്സണലിന്റെ അടുത്ത മത്സരം. ഗണ്ണേഴ്സിന്റെ തട്ടകമായ എമിറേറ്റ്സ് സ്റ്റേഡിയത്തിലാണ് മത്സരം നടക്കുക.