പറ്റ്‌ന: തിരഞ്ഞെടുപ്പ് തന്ത്രജ്ഞന്‍ പ്രശാന്ത് കിഷോര്‍ അടുത്തിടെ രൂപീകരിച്ച ജന്‍ സൂരജ് പാര്‍ട്ടി നിതീഷ് കുമാറിന്റെ സഖ്യത്തിന്റെ 'ബി ടീമായി' പ്രവര്‍ത്തിക്കുന്നുവെന്ന് രാഷ്ട്രീയ ജനതാദള്‍ (ആര്‍ജെഡി) നേതാവ് തേജസ്വി യാദവ് ആരോപിച്ചു.

അടുത്തിടെ നടന്ന ബീഹാര്‍ പബ്ലിക് സര്‍വീസ് കമ്മീഷന്‍ നടത്തിയ സിസിഇ പരീക്ഷ വീണ്ടും നടത്തണമെന്നാവശ്യപ്പെട്ട് ഉദ്യോഗാര്‍ഥികള്‍ പ്രതിഷേധിച്ചിരുന്നു. പ്രതിഷേധിച്ച വിദ്യാര്‍ഥിളെ പിരിച്ചുവിടാന്‍ പൊലിസ് ജലപീരങ്കി പ്രയോഗിച്ചതിന് മണിക്കൂറുകള്‍ക്ക് ശേഷമാണ് മുന്‍ ഉപമുഖ്യമന്ത്രി തേജ്വസി യാദവ് പ്രശാന്ത് കിഷോറിനെ വിമര്‍ശിച്ച് രംഗത്തെത്തിയത്.

ഡിസംബര്‍ 13ന് ബീഹാര്‍ പിഎസ്‌സി നടത്തിയ പരീക്ഷയുടെ ചോദ്യപേപ്പര്‍ ചോര്‍ന്നെന്നാണ് ഉദ്യോഗാര്‍ഥികളുടെ ആരോപണം. ഉദ്യോഗാര്‍ഥികള്‍ക്ക് പിന്തുണയുമായി ബീഹാര്‍ പ്രതിപക്ഷ നേതാവുമായ തേജസ്വി യാദവ് രംഗത്തെത്തി. പരീക്ഷാര്‍ഥികളുടെ ആവശ്യം ന്യായമാണെന്നും വീണ്ടും പരീക്ഷ നടത്തണമെന്നും തേജസ്വി യാദവ് ആവശ്യപ്പെട്ടു. 

ഈ പ്രസ്ഥാനം ആരംഭിച്ചത് ഉദ്യോഗാര്‍ഥികളാണ്. ഗാര്‍ദാനി ബാഗില്‍ രണ്ടാഴ്ചയോളം നീണ്ട ധര്‍ണ സര്‍ക്കാരിനെ വിറളി പിടിപ്പിച്ചിരുന്നു. ഈ സന്ദര്‍ഭത്തില്‍, സര്‍ക്കാരിന്റെ ബി ടീമായി പ്രവര്‍ത്തിക്കുന്ന ചിലര്‍ വന്നുസമരം തകര്‍ക്കാന്‍ ശ്രമിക്കുകയാണ്, തേജസ്വി യാദവ് പറഞ്ഞു.

ചോദ്യപേപ്പര്‍ ചോര്‍ന്നെന്ന് ആരോപിച്ച് ഇന്നലെയാണ് ആയിരത്തിലധികം വരുന്ന ഉദ്യോഗാര്‍ഥികള്‍ പ്രതിഷേധവുമായി രംഗത്തെത്തുകയായിരുന്നു. പറ്റ്‌നയിലെ ഗാന്ധി മൈതാനിയിലാണ് ഉദ്യോഗാര്‍ഥികള്‍ തടിച്ചുകൂടിയത്. പിന്നാലെയാണ് പ്രതിഷേധം അക്രമാസക്തമായത്. പൊലിസിന്റെ ഉച്ചഭാഷിണികള്‍ തകര്‍ക്കുകയും ഡ്യൂട്ടിയിലായിരുന്ന മജിസ്‌ട്രേറ്റുമാരുമായും പൊലിസ് ഉദ്യോഗസ്ഥരുമായും പ്രതിഷേധക്കാര്‍ ഏറ്റുമുട്ടി.

പരീക്ഷ റദ്ദാക്കാന്‍ ലക്ഷ്യമിട്ടുള്ള ഗൂഢാലോചനയുടെ ഭാഗമായാണ് പ്രതിഷേധമെന്ന് ചൂണ്ടിക്കാട്ടി ബിപിഎസ്‌സി ആരോപണങ്ങള്‍ തള്ളി. സമരം അക്രമാസക്തമാക്കിയതിന്റെ പേരില്‍ പ്രശാന്ത് കിഷോറിനെതിരെ എഫ്‌ഐആര്‍ രജിസ്റ്റര്‍ ചെയ്തിട്ടുണ്ട്.