സാക്സ്റ്റൺ ഓവൽ: ന്യൂസിലാൻഡിനെതിരായ ട്വന്റി ട്വന്റി മത്സരത്തിൽ ശ്രീലങ്കക്ക് ഏഴ് റൺസിന്റെ വിജയം. സാക്സ്റ്റൺ ഓവലിൽ നടന്ന മത്സരത്തിൽ ടോസ് നേടിയ ന്യൂസിലാൻഡ് ശ്രീലങ്കയെ ബാറ്റിങ്ങിനയക്കുകയായിരുന്നു. ആദ്യ ബാറ്റ് ചെയ്ത ശ്രീലങ്ക 20 ഓവറിൽ അഞ്ചു വിക്കറ്റ് നഷ്ടത്തിൽ 218 റൺസാണ് നേടിയത്. വിജയലക്ഷ്യം പിന്തുടർന്നിറങ്ങിയ ന്യൂസിലാൻഡ് ഇന്നിങ്സ് ഏഴ് വിക്കറ്റ് നഷ്ടത്തിൽ 211 റൺസിൽ അവസാനിക്കുകയായിരുന്നു. 

ശ്രീലങ്കൻ ബാറ്റിങ്ങിൽ കുശാൽ പെരേര സെഞ്ച്വറി നേടി മികച്ച പ്രകടനമാണ് നടത്തിയത്. പുതുവത്സരത്തിലെ അന്താരാഷ്ട്ര മത്സരത്തിലെ ആദ്യ സെഞ്ച്വറി ആയിരുന്നു ഇത്. 46 പന്തിൽ 101 റൺസാണ് കുശാൽ പെരേര നേടിയത്. 13 ഫോറുകളും നാല് സിക്സുകളുമാണ് താരത്തിന്റെ ബാറ്റിൽ നിന്നും പിറന്നത്. ക്യാപ്റ്റൻ ചരിത് അസലങ്കയും മികച്ച പ്രകടനമാണ് നടത്തിയത്. 24 പന്തിൽ 46 റൺസാണ് ചരിത് നേടിയത്. ഒരു ഫോറം അഞ്ചു സിക്സുകളും അടങ്ങുന്നതായിരുന്നു താരത്തിന്റെ ഇന്നിംഗ്സ്.

ബൗളിങ്ങിലും ചരിത് അസലങ്ക മിന്നും പ്രകടനമാണ് നടത്തിയത്. മൂന്ന് വിക്കറ്റുകളാണ്‌ താരം വീഴ്ത്തിയത്. വനിന്ദു ഹസരംഗ രണ്ട് വിക്കറ്റും നുവാൻ തുഷാര, ബിനുറ ഫെർണാണ്ടോ എന്നിവർ ഓരോ വിക്കറ്റും നേടി. കിവീസ് ബാറ്റിങ്ങിൽ രചിൻ രവീന്ദ്ര അർദ്ധ സെഞ്ച്വറി നേടി. 39 പന്തിൽ 69 റൺസാണ് രചിൻ നേടിയത്. അഞ്ചു ഫോറുകളും നാല് സിക്സുകളുമാണ് താരം അടിച്ചെടുത്തത്.

ടിം റോബിൻസൺ 21 പന്തിൽ 37 റൺസും ഡാറിൽ മിച്ചൽ 17 പന്തിൽ 35 റൺസും നേടി മികച്ച മികച്ച പ്രകടനം നടത്തിയെങ്കിലും ഏഴ് റൺസ് അകലെ വിജയം നഷ്ടമാവുകയായിരുന്നു.