മെൽബൺ: ഇന്ത്യ-ഓസ്‌ട്രേലിയ നാലാം ടെസ്റ്റിലെ നാലാം ദിനം അവസാനിച്ചു. കളി നിർത്തുമ്പോൾ ഓസ്‌ട്രേലിയ 228 റൺസിന്‌ ഒമ്പത് വിക്കറ്റുകൾ എന്ന നിലയിലാണ്. നിലവിൽ 333 റൺസ് ലീഡാണ് ഓസ്‌ട്രേലിയക്ക് ഉള്ളത്. അവസാന വിക്കറ്റിൽ സ്കോട്ട് ബോളണ്ടും നഥാൻ ലിയോണും ചേർന്ന് മികച്ച കൂട്ടുകെട്ടാണ് ഓസ്‌ട്രേലിയക്കായി നടത്തിയത്. ലിയോൺ 54 പന്തിൽ 41 റൺസും ബോളണ്ട് 65 പന്തിൽ പത്തു റൺസും നേടിയാണ് ക്രീസിൽ തുടരുന്നത്.

നീണ്ട പത്തു വർഷങ്ങൾക്ക് ശേഷമാണ് ഓസ്‌ട്രേലിയയിൽ നടക്കുന്ന ടെസ്റ്റ് മത്സരത്തിൽ പതിനൊന്നാം നമ്പറിൽ ഇറങ്ങികൊണ്ട് ഒരു ഓസ്‌ട്രേലിയൻ താരം 50+ പന്തുകൾ നേരിടുന്നത്. ഇതിനു മുമ്പ് ജോഷ് ഹേസൽവുഡാണ് പതിനൊന്നാം പൊസിഷനിൽ ഇറങ്ങി 50+ പന്തുകൾ നേരിട്ടത്. 2014ൽ ബ്രിസ്ബെയ്നിൽ നടന്ന മത്സരത്തിൽ ഇന്ത്യക്കെതിരെയായിരുന്നു ഹേസൽവുഡ് അവസാന പൊസിഷനിൽ ഇറങ്ങി 50ലധികം പന്തുകൾ നേരിട്ടത്. 

ഓസ്‌ട്രേലിയക്കായി മാർനസ് ലബുഷാനെ അർദ്ധ സെഞ്ച്വറി നേടി മികച്ച പ്രകടനമാണ് നടത്തിയത്. 139 പന്തിൽ 70 റൺസാണ് താരം നേടിയത്. മൂന്നു ഫോറുകളാണ് താരം നേടിയത്. പാറ്റ് കമ്മിൻസും 90 പന്തിൽ 41 റൺസും നേടി. നാല് ഫോറുകൾ അടങ്ങുന്നതായിരുന്നു കമ്മിൻസിന്റെ ഇന്നിംഗ്സ്. ഇന്ത്യൻ ബൗളിങ്ങിൽ ജസ്പ്രീത് ബുംറ നാല് വിക്കറ്റുകൾ വീഴ്ത്തി തിളങ്ങിയപ്പോൾ മുഹമ്മദ് സിറാജ് മൂന്നു വിക്കറ്റുകളും നേടി. രവീന്ദ്ര ജഡേജ ഒരു വിക്കറ്റും നേടി.