ദമാസ്‌കസ്: വിമത സൈന്യം രാജ്യത്തിന്റെ അധികാരം പിടിച്ചെടുത്തതോടെ നാടുവിട്ട മുന്‍ സിറിയന്‍ പ്രസിഡന്റ് ബശ്ശര്‍ അല്‍ അസദ് സൈനിക രഹസ്യങ്ങള്‍ ഇസ്റാഈലിന് കൊമാറിയതായി ആരോപണം. പ്രസിഡന്റ് രാജ്യം വിട്ടത് ആയുധശേഖരങ്ങളുടെയും അവ സൂക്ഷിച്ചിരിക്കുന്ന സ്ഥലങ്ങളുടെയും അടക്കമുള്ള വിവരങ്ങള്‍ ചോര്‍ത്തി നല്‍കിയാണെന്ന് തുര്‍ക്കി ദിനപത്രമായ ഹുറിയത്ത് റിപോര്‍ട്ട് ചെയ്യുന്നു. 

രാജ്യം വിടുമ്പോൾ ഇസ്റാഈല്‍ തന്നെ ആക്രമിക്കരുതെന്ന ഉറപ്പ് ലഭിക്കാനായാണ് ആയുധങ്ങളുള്ള സ്ഥലങ്ങള്‍ ചോര്‍ത്തിക്കൊടുത്തതെ് ഹുറിയത്തിന്റെ റിപോര്‍ട്ട് വ്യക്തമാക്കുന്നു.

സിറിയന്‍ ഭരണകൂടത്തിന്റെ ആയുധങ്ങള്‍ വിമതരുടെ കൈവശം എത്തിച്ചേരാതിരിക്കാനാണ് ആക്രമണം നടത്തിയതെന്നായിരുന്നു ഇസ്റാഈലിന്റെ അവകാശവാദം. ബശ്ശര്‍ നാടുവിട്ട് 48 മണിക്കൂറിനിടെ 400ലേറെ ആക്രമണങ്ങളാണ് സിറിയയില്‍ നടന്നത്. കടലില്‍ നിന്ന് തൊടുക്കാവുന്ന മിസൈലുകള്‍, ആയുധനിര്‍മ്മാണ കേന്ദ്രങ്ങള്‍, വിമാനവേധ മിസൈലുകള്‍, 15 നാവികസേനാ കപ്പലുകള്‍ എന്നിവ ആക്രമണത്തിൽ തകര്‍ത്തെന്നാണ് ഐ.ഡി.എഫ് അവകാശപ്പെട്ടത്. കൂടാതെ സിറിയയില്‍ ആക്രമണം നടത്തുന്ന വീഡിയോയും ഇവര്‍ പങ്കുവെച്ചിരുന്നു.

വടക്കുപടിഞ്ഞാറന്‍ സിറിയയിലെ ടാര്‍ട്ടസിലെ ആയുധ താവളത്തിനു നേരെ ഇസ്റാഈല്‍ ആക്രമണം നടത്തിയതായി യു.കെ ആസ്ഥാനമായുള്ള സിറിയന്‍ ഒബ്‌സര്‍വേറ്ററി ഫോര്‍ ഹ്യൂമന്‍ റൈറ്റ്‌സും (എസ്.ഒ.എച്ച്.ആർ)  ചൂണ്ടിക്കാട്ടി. ഇക്കഴിഞ്ഞ നവംബര്‍ 27നായിരുന്നു വിമതര്‍ അസദ് ഭരണകൂടത്തിനെതിരെ ശക്തമായ മുന്നേറ്റം നടത്തിയത്. 

There have been allegations that Syrian President Bashar al-Assad fled Syria after leaking military secrets to Israel