തിരുവനന്തപുരം: തിരുവനന്തപുരം യൂണിവേഴ്‌സിറ്റി കോളേജിലെ എസ്.എഫ്.ഐ യൂണിറ്റ് കമ്മിറ്റി പിരിച്ചു വിടും. സി.പി.എം നേതൃത്വം ഇടപെട്ടിട്ടും യൂണിറ്റ് കമ്മിറ്റി ഭാരവാഹികള്‍ അക്രമ സംഭവങ്ങള്‍ തുടരുന്ന പശ്ചാത്തലത്തിലാണ് തീരുമാനം. എസ്.എഫ്.ഐ സംസ്ഥാന കമ്മിറ്റിയ്ക്ക് സി.പി.എം ജില്ലാ സെക്രട്ടറിയേറ്റാണ് നിര്‍ദ്ദേശം നല്‍കിയത്. 

യൂണിറ്റ് കമ്മിറ്റിക്ക് പകരം പുതിയ അഡ്‌ഹോക്ക് കമ്മിറ്റിയെ തെരഞ്ഞെടുക്കും. കോളജില്‍ തുടര്‍ച്ചയായി ഉണ്ടാകുന്ന സംഘര്‍ഷങ്ങളുടെ പശ്ചാത്തലത്തിലാണ് നടപടി. 

കോളേജില്‍ എസ്.എഫ്.ഐ പ്രവര്‍ത്തകനായ ഭിന്നശേഷിക്കാരനായ വിദ്യാര്‍ത്ഥിയെ മര്‍ദ്ദിച്ച യൂണിറ്റ് ഭാരവാഹികള്‍ ഉള്‍പ്പെടെ നാലു പേരെ കഴിഞ്ഞ ദിവസം സസ്‌പെന്‍ഡ് ചെയ്തിരുന്നു. ഇതിന് പിന്നാലെ ലക്ഷദ്വീപ് സ്വദേശിയായ വിദ്യാര്‍ത്ഥിയെയും ഹോസ്റ്റലിനുള്ളില്‍ വെച്ചു എസ്.എഫ്.ഐക്കാര്‍ മര്‍ദ്ദിച്ചതോടെയാണ് പാര്‍ട്ടി ഇടപെടല്‍.