പാരിസ്:  ഒളിംപിക്‌സ് ഉദ്ഘാടനച്ചടങ്ങിനു മണിക്കൂറുകള്‍ മാത്രം ശേഷിക്കേ ഫ്രാന്‍സിലെ വിവിധയിടങ്ങളില്‍ അതിവേഗ ട്രെയിന്‍ ശൃംഖലയ്ക്കുനേരെ ആക്രമണം. റെയില്‍വേ ലൈനിന് തീവെപ്പടക്കമുള്ള സംഭവങ്ങള്‍ നടന്നതായും പലയിടത്തും റെയില്‍വേ സംവിധാനങ്ങള്‍ നശിപ്പിക്കപ്പെട്ടതായും ട്രെയിന്‍ ഓപ്പറേറ്റര്‍ എസ്.എന്‍.സി.എഫ് അറിയിച്ചു. അട്ടിമറി ശ്രമമാണു നടന്നതെന്നും അധികൃതര്‍ പറഞ്ഞു.

ഫ്രാന്‍സിന്റെ കിഴക്ക്, വടക്ക്, പടിഞ്ഞാറന്‍ മേഖലയിലുള്ളവയാണ് നശിപ്പിക്കപ്പെട്ടത്. ഇതുമൂലം റെയില്‍ ഗതാഗതത്തില്‍ ഗുരുതരമായ പ്രത്യാഘാതങ്ങള്‍ ഉണ്ടാകുമെന്നും അധികൃതര്‍ അറിയിച്ചു. ആക്രമണം 800000 യാത്രക്കാരെ ബാധിച്ചതായി റെയില്‍ ഓപ്പറേറ്റര്‍ എസ്എന്‍സിഎഫ് ചീഫ് എക്സിക്യൂട്ടീവ് ജീന്‍-പിയറി ഫരാന്‍ഡോ പറഞ്ഞു.

ട്രെയിനുകള്‍ മറ്റു ട്രാക്കുകളിലൂടെ വഴിതിരിച്ചുവിടുകയാണ്. എന്നാല്‍ അവയില്‍ പലതും റദ്ദാക്കേണ്ടതായി വരുമെന്നും പ്രസ്താവനയില്‍ പറയുന്നു. യാത്രക്കാരോട് യാത്രകള്‍ മാറ്റിവെക്കാനും റെയില്‍വേ സ്റ്റേഷനുകളില്‍ നിന്നും മാറി നില്‍ക്കാനും അധികൃതര്‍ ആവശ്യപ്പെട്ടു.