കൊല്‍ക്കത്ത: യുവ വനിതാ ഡോക്ടര്‍ ആശുപത്രിയില്‍ ക്രൂരമായ ബലാത്സംഗത്തിനിരയായി കൊല്ലപ്പെട്ട സംഭവത്തില്‍ സര്‍ക്കാരും പൊലിസും ആരോപണം നേരിടുന്ന ബംഗാളില്‍ ആശുപത്രിയില്‍ വച്ച് വീണ്ടും ആരോഗ്യപ്രവര്‍ത്തകയ്ക്ക് നേരെ ലൈംഗികാതിക്രമം. ശനിയാഴ്ച രാത്രി ബിര്‍ഭൂമിലെ ഇളംബസാര്‍ ഹെല്‍ത്ത് സെന്ററിലാണ് സംഭവം. 

ചികിത്സയ്ക്കായി ഹെല്‍ത്ത് സെന്ററില്‍ എത്തിച്ച പ്രതി സലൈന്‍ നല്‍കുന്നതിനിടെ നഴ്സിന്റെ സ്വകാര്യഭാഗങ്ങളില്‍ ദുരുദ്ദേശ്യത്തോടെ സ്പര്‍ശിക്കുകയായിരുന്നു. 

തീവ്രപരിചരണ വിഭാഗത്തില്‍ പ്രവേശിപ്പിക്കപ്പെട്ട രോഗിയ്ക്കെതിരേയാണ് നഴ്സ് പരാതി നല്‍കിയിരിക്കുന്നത്. സംഭവം നടക്കുമ്പോള്‍ രോഗിയുടെ ബന്ധുക്കളും സമീപത്തുണ്ടായിരുന്നുവെന്നും പരാതിയില്‍ പറയുന്നു. തന്നോട് മോശമായ ഭാഷയില്‍ സംസാരിച്ചെന്നും നഴ്സ് പറയുന്നു.

സംഭവത്തിനു പിന്നാലെ ആശുപത്രി അധികൃതര്‍ പൊലിസില്‍ പരാതിപ്പെട്ടു. തുടര്‍ന്ന് പൊലിസ് സ്ഥലത്തെത്തുകയും അതിക്രമം നടത്തിയ രോഗിയെ അറസ്റ്റ് ചെയ്യുകയും ചെയ്തു.