ന്യൂഡല്‍ഹി: രാജ്യത്ത് പൊലിസ് കസ്റ്റഡിയില്‍ ഏറ്റവുമധികം പീഡനം നേരിടുന്നത് മുസ്‌ലിംകളും ദലിതരുമെന്ന് റിപ്പോര്‍ട്ട്. 'സ്റ്റാറ്റസ് ഓഫ് പൊലിസിങ് ഇന്ത്യ റിപ്പോര്‍ട്ട് 2025'ല്‍ ആണ് മുസ്‌ലിംകളും ദലിതരുമാണ് മറ്റു വിഭാഗങ്ങളെ അപേക്ഷിച്ച് കൂടുതല്‍ പീഡനം നേരിടുന്നതെന്ന് ചൂണ്ടിക്കാട്ടുന്നത്. ന്യൂഡല്‍ഹി ആസ്ഥാനമായി പ്രവര്‍ത്തിക്കുന്ന പൗരാവകാശ സമിതി ഇന്ത്യ ഇന്റര്‍നാഷനല്‍ സെന്ററില്‍ പ്രകാശനം ചെയ്ത റിപ്പോര്‍ട്ടിലാണ് ഞെട്ടിക്കുന്ന വിവരങ്ങളുള്ളത്.

കുറ്റകൃത്യങ്ങളില്‍ ഏര്‍പ്പെടുന്നവരില്‍ കൂടുതലും ന്യൂനപക്ഷങ്ങളും ദലിതരുമാണെന്ന് കരുതുന്നതായും ദരിദ്രരും പാര്‍ശ്വവല്‍ക്കരിക്കപ്പെട്ടവരും തുടര്‍ച്ചയായി കുറ്റകൃത്യങ്ങളില്‍ ഏര്‍പ്പെടുന്നവരാണെന്നും സര്‍വേയില്‍ പങ്കെടുത്ത പൊലിസ് ഓഫിസര്‍മാരില്‍ ഭൂരിപക്ഷവും വിശ്വസിക്കുന്നതായി റിപ്പോര്‍ട്ട് ചൂണ്ടിക്കാട്ടുന്നു.

ഐ.പി.എസ് ഉദ്യോഗസ്ഥരടക്കമുള്ള 34 ശതമാനത്തോളം പേര്‍ കസ്റ്റഡി പീഡനത്തെ ന്യായീകരിച്ചു. ഗുജറാത്ത്, ജാര്‍ഖണ്ഡ് എന്നിവിടങ്ങളില്‍ നിന്നുള്ള പൊലിസുകാരാണ് (50%) കസ്റ്റഡി പീഡനത്തെ ന്യായീകരിച്ചത്. അതേസമയം, കേരളത്തില്‍ നിന്നുള്ള പൊലിസുകാരില്‍ ഒരു ശതമാനമേ കസ്റ്റഡി പീഡനത്തെ ന്യായീകരിച്ചുള്ളൂ.

മുസ്‌ലിംകളും ദലിതരും ദരിദ്ര ജനവിഭാഗങ്ങളില്‍ പെട്ടവരുമാണ് കസ്റ്റഡിയില്‍ പീഡിപ്പിക്കപ്പെടുന്നവരില്‍ ബഹുഭൂരിപക്ഷവും. സര്‍വേയില്‍ പങ്കെടുത്ത പൊലിസുകാരില്‍ 11 ശതമാനം പേരും പ്രതികളുടെ ബന്ധുക്കളെ വരെ മര്‍ദിക്കുന്നതിനെ ന്യായീകരിച്ചു. അതേസമയം, 30 ശതമാനത്തോളം പേര്‍ ചില സാഹചര്യങ്ങളില്‍ മാത്രമാണ് മര്‍ദിക്കുന്നതെന്നും 25 ശതമാനത്തോളം പേര്‍ സഹകരിക്കാത്ത സാക്ഷികളെ മാത്രമാണ് മര്‍ദിക്കാറുള്ളതെന്നും വ്യക്തമാക്കി. എന്നാല്‍, 9 ശതമാനം പേര്‍ കസ്റ്റഡിയില്‍ മൂന്നാം മുറ പ്രയോഗിക്കുന്നതിനെ ന്യായീകരിക്കുന്നവരാണ്.

2019ല്‍ 'കസ്റ്റഡി പീഡനത്തിനെതിരേ ദേശീയ തലത്തിലെ പ്രചാരണം' എന്ന സംഘടന നടത്തിയ പഠനത്തില്‍ ആ വര്‍ഷം രാജ്യത്ത് 124 കസ്റ്റഡി മരണങ്ങള്‍ സംഭവിച്ചുവെന്ന് കണ്ടെത്തി. ഇതില്‍ 60 ശതമാനവും ന്യൂനപക്ഷ ദലിത് ആദിവാസി വിഭാഗങ്ങളില്‍ പെട്ടവരായിരുന്നു. കൊല്ലപ്പെട്ടവരില്‍ അധികവും ദിവസവേതന തൊഴിലാളികളോ സുരക്ഷാ ജീവനക്കാരോ ഡ്രൈവര്‍മാരോ ആയിരുന്നു.
രാജ്യത്തിന്റെ വിവിധ ഭാഗങ്ങളിലുള്ള 8,276 വിവിധ റാങ്കുകളില്‍ പെട്ട പൊലിസുദ്യോഗസ്ഥരില്‍ സര്‍വേ നടത്തിയാണ് റിപ്പോര്‍ട്ട് തയാറാക്കിയത്. 17 സംസ്ഥാനങ്ങളിലും കേന്ദ്രഭരണപ്രദേശങ്ങളിലുമായി 82 സ്ഥലങ്ങളിലെ പൊലിസ് ഉദ്യോഗസ്ഥരില്‍ നിന്നുള്ള വിവരങ്ങള്‍ ശേഖരിച്ചാണ് റിപ്പോര്‍ട്ട് തയാറാക്കിയത്.