ന്യൂഡല്‍ഹി: ഇന്ത്യയില്‍ ക്രിസ്ത്യാനികള്‍ക്കെതിരായ അക്രമസംഭവങ്ങള്‍ വര്‍ധിച്ചതായി ക്രിസ്ത്യന്‍ സംഘടന. കഴിഞ്ഞ വര്‍ഷം രാജ്യത്ത് ക്രിസ്ത്യാനികള്‍ക്കെതിരേ 840ലധികം അക്രമസംഭവങ്ങള്‍ ഉണ്ടായതായി ഇവാഞ്ചലിക്കല്‍ ഫെലോഷിപ്പ് പുറത്തിറക്കിയ റിപ്പോര്‍ട്ടില്‍ പറയുന്നു. ഏറ്റവും കൂടുതല്‍ അക്രമസംഭവങ്ങള്‍ രേഖപ്പെടുത്തിയിരിക്കുന്നത് ഉത്തര്‍പ്രദേശിലാണ്. കഴിഞ്ഞ വര്‍ഷം മാത്രം 188 സംഭവങ്ങള്‍ യു.പിയിലുണ്ടായി.

ഛത്തീസ്ഗഢ് (150), രാജസ്ഥാന്‍ (40), പഞ്ചാബ് (38), മധ്യപ്രദേശ് (37), ഹരിയാന (34) എന്നിവയാണ് കൂടുതല്‍ ആക്രമണങ്ങള്‍ നടന്ന മറ്റ് സംസ്ഥാനങ്ങള്‍. മിഷനററി പ്രവര്‍ത്തകര്‍ക്കെതിരെയുള്ള ശാരീരിക ആക്രമണങ്ങള്‍, പള്ളികള്‍ നശിപ്പിക്കല്‍, പ്രാര്‍ഥനാ യോഗങ്ങള്‍ തടസപ്പെടുത്തല്‍, സാമൂഹിക വിലക്ക് തുടങ്ങിയവ ആക്രമണങ്ങളില്‍ ഉള്‍പ്പെടുന്നു. മതപരമായ ഒത്തുചേരലുകള്‍ക്കിടയില്‍, പ്രത്യേകിച്ച് ഞായറാഴ്ചകളില്‍ അക്രമ സംഭവങ്ങള്‍ വര്‍ധിക്കുന്നു.

ക്രിസ്ത്യാനികളെ ലക്ഷ്യംവച്ച് കൊണ്ടുവന്ന 2021 ലെ നിയമവിരുദ്ധ മതപരിവര്‍ത്തന നിരോധന നിയമം ഉത്തര്‍പ്രദേശില്‍ വ്യാപകമായി ദുരുപയോഗം ചെയ്യപ്പെട്ടു. ആദിവാസി മേഖലകളിലെ ക്രിസ്ത്യന്‍ വിഭാഗം തുടര്‍ച്ചയായ അക്രമം, സാമൂഹിക ബഹിഷ്‌കരണം, സാമ്പത്തിക പരാധീനത എന്നിവ നേരിടുന്നുവെന്നും റിപ്പോര്‍ട്ട് പറയുന്നു. കഴിഞ്ഞ വര്‍ഷം ജനുവരിയില്‍ 71 സംഭവങ്ങളാണ് റിപ്പോര്‍ട്ട് ചെയ്തത്.

A report by the Evangelical Fellowship of India highlights a surge in attacks against Christians in India, with over 840 incidents recorded in 2023. Uttar Pradesh reported the highest number (188), followed by Chhattisgarh (150) and Rajasthan (40).