വാരണാസി: നവരാത്രി ആഘോഷം മുന്‍നിര്‍ത്തി ഞായറാഴ്ച്ച മുതല്‍ ഒന്‍പത് ദിവസത്തേക്ക് മത്സ്യ-മാംസ കടകള്‍ വിലക്കി വാരണാസി നഗരസഭ. നവരാത്രി ആഘോഷം നടക്കുന്ന ദിവസങ്ങളില്‍ ഇറച്ചികടകളും, മീന്‍കടകളും, കോഴിക്കടകളും പൂട്ടിയിടണമെന്നാണ് വാരണാസി ഭരണകൂടം ഉത്തരവിറക്കിയത്. തിങ്കളാഴ്ച്ച ചെറിയ പെരുന്നാള്‍ പ്രതീക്ഷിക്കുന്നതിനാല്‍ ഉത്തരവ് പ്രതിഷേധത്തിന് കാരണമായിട്ടുണ്ട്. 

ഹിന്ദുക്കള്‍ നവരാത്രിയെ പവിത്രമായാണ് കാണുന്നതെന്നും, ഇക്കാര്യം മുസ് ലിങ്ങള്‍ പരിഗണിക്കണമെന്നും വാരണാസി മേയര്‍ അശോക് കുമാര്‍ തിവാരി ആവശ്യപ്പെട്ടു. അതിനാല്‍ ഉത്തരവ് കര്‍ശനമായി പാലിക്കണമെന്നും മേയര്‍ ആവശ്യപ്പെട്ടു. 

നവരാത്രി സമയങ്ങളില്‍ മത്സ്യ-മാംസ കടകള്‍ അടച്ച് പൂട്ടാനുള്ള നിര്‍ദേശം നഗരസഭാ യോഗത്തില്‍ എക്‌സിക്യൂട്ടീവ് കമ്മിറ്റി അംഗമായ മദന്‍ മോഹന്‍ ദുബെയാണ് ഉയര്‍ത്തിയത്. ഇത് യോഗം അംഗീകരിക്കുകയായിരുന്നു. വാരണാസി മതപരവും, സാംസ്‌കാരികവുമായ തലസ്ഥാനമാണെന്നും, പ്രതിദിനം രണ്ട് ലക്ഷം പേരാണ് നഗരത്തില്‍ എത്തുന്നതെന്നും മേയര്‍ പറഞ്ഞു. അതിനാല്‍ ഉത്തരവിനെ പലപ്രയോഗമായി കാണരുതെന്നും മേയര്‍ ആവശ്യപ്പെട്ടു. 

നേരത്തെ കാശിവിശ്വനാഥ ക്ഷേത്രത്തിന് സമീപത്തെ 26 നോണ്‍ വെജ് ഹോട്ടലുകള്‍ ഈ മാസം തുടക്കത്തില്‍ അടച്ച് പൂട്ടിയിരുന്നു. നൈസാദക്, ബെനിയബാഗ് എന്നീ മുസ്‌ലിം ഭൂരിപക്ഷ പ്രദേശങ്ങളില്‍ നോണ്‍ വെജ് വില്‍പ്പനക്കെതിരെ കര്‍ശന നടപടികളും ആരംഭിച്ചിട്ടുണ്ട്.