കൊച്ചി: സ്വര്‍ണത്തരികളടങ്ങിയ മണ്ണ് വാഗ്ദാനം ചെയ്ത് തട്ടിയത് അരക്കോടി. തമിഴ്‌നാട് സ്വദേശികളാണ് വന്‍ തട്ടിപ്പുമായെത്തിയത്. തമിഴ്നാട് നാമക്കല്‍ സ്വദേശികളായ സ്വര്‍ണപ്പണിക്കാരെ കബളിപ്പിച്ച് 50 ലക്ഷം രൂപയും 18 ലക്ഷം രൂപയുടെ രണ്ട് ചെക്കുമാണ് ഇവര്‍ കൈക്കലാക്കിയത്. തട്ടിപ്പ് നടത്തിയ സൂറത്ത് സ്വദേശികളായ സന്ദീപ് ഹസ്മുഖ് ഭായ് (37), വിപുള്‍ മഞ്ചി ഭായ് (43), ധര്‍മേഷ് ഭായ് (38), കൃപേഷ് ഭായ് (35) എന്നിവരെ പൊലിസ് അറസ്റ്റ് ചെയ്തു. പാലാരിവട്ടം പൊലിസ് ആണ് സംഘത്തെ അറസ്റ്റ് ചെയ്തത്.  

പാലാരിവട്ടം നോര്‍ത്തില്‍ ജനതാ റോഡില്‍ കെട്ടിടം വാടകയ്‌ക്കെടുത്തായിരുന്നു തട്ടിപ്പ്. സ്വര്‍ണാഭരണ ഫാക്ടറിയില്‍നിന്ന് ശേഖരിച്ച സ്വര്‍ണത്തരികള്‍ അടങ്ങിയ മണ്ണാണെന്ന് പറഞ്ഞ് വിശ്വസിപ്പിച്ചാണ് ഇവര്‍ തട്ടിപ്പ് നടത്തിയത്.  

ആദ്യം അഞ്ഞൂറോളം ചാക്കുകളില്‍ നിറച്ചുവച്ചിരുന്ന മണ്ണില്‍നിന്ന് തമിഴ്നാട് സ്വദേശികളെക്കൊണ്ട് ഇവര്‍ അഞ്ചുകിലോ സാമ്പിള്‍ എടുപ്പിച്ചു. ഒരു മുറിയില്‍ പ്രത്യേകം തയ്യാറാക്കിയ മേശയുടെ മുകളില്‍ വച്ച ത്രാസില്‍ വെച്ച് സാമ്പിള്‍ തൂക്കി നോക്കാന്‍ പറഞ്ഞു. അറിയാത്ത രൂപത്തില്‍ തയ്യാറാക്കിയ ദ്വാരങ്ങള്‍ മേശക്കും ത്രാസിനുമുണ്ടായിരുന്നു. സാമ്പിള്‍ തൂക്കി നോക്കുന്ന സമയത്ത് മേശക്കടിയില്‍ ഒളിച്ചിരുന്ന പ്രതികളിലൊരാള്‍ ഈ ദ്വാരത്തിലൂടെ സിറിഞ്ച് ഉപയോഗിച്ച് മണ്ണ് നിറച്ച കിറ്റിലേക്ക് സ്വര്‍ണലായനി കുത്തിവച്ചു. ഈ സാമ്പിളില്‍നിന്ന് സ്വര്‍ണം വേര്‍തിരിച്ചെടുക്കാനായതോടെ നാമക്കല്‍ സ്വദേശികള്‍ക്ക് മണ്ണില്‍ സ്വര്‍ണത്തരികളുണ്ടെന്ന കാര്യം വിശ്വാസമാവുകയും ചെയ്തു. തുടര്‍ന്ന് ഇവര്‍ പ്രതികള്‍ ചോദിച്ച പണം നല്‍കാനും തയ്യാറായി. 

എന്നാല്‍, സാമ്പിളായി എടുത്ത മണ്ണില്‍നിന്ന് സാധാരണ ലഭിക്കുന്നതിലും കൂടുതല്‍ അളവില്‍ സ്വര്‍ണം ലഭിച്ചു. ഇതോടെ തമിഴ്‌നാട് സ്വദേശികള്‍ക്ക് സംശയം തോന്നി. തുടര്‍ന്നാണ് ഇവര്‍ പൊലിസിനെ സമീപിക്കുന്നത്. സമാനരീതിയില്‍ തട്ടിപ്പ് നടത്തിയതിന് ഇവരുടെ പേരില്‍ നാമക്കല്ലിനുസമീപത്തെ സേന്തമംഗലം സ്റ്റേഷനിലും എറണാകുളം നോര്‍ത്ത് സ്റ്റേഷനിലും പരാതികളുണ്ട്.